Alcaraz hnawtchhuaktu Zverev

Australian Open 2024 khelh mek chu nilaini khan mipa quarter-final khelh zawh a ni a. Quarter-final hnuhnung ber; inkhel hmuhnawm takah Olympic champion Alexander Zverev chuan Carlos Alcaraz a hneh a, semi-final a lut. Zverev hian Daniil Medvedev a hmachhawn zui leh ang.
Grand Slam-ah top 5 player laka hnehna la chang ngai lo Zverev hian World No. 2 Carlos Alacaraz lakah tha zetin bul a tan a, set khatnaah game khat chiah a hloh. Awlsam zeta set khatna a lak hnuin set hnihnaah a khel tha chhunzawm a, set tir lamah break a neih a chhawr tangkai a, game thum hloh chungin set a la nawn leh.
Set hnih a lak zawn hnuin set thumnaah pawh Zverev hi a khel tha zui viau a, tha chungchuang takin bul a tan leh. Hma takah break a nei leh a, 5-2-a hma a hruai tawh vangin Alcaraz lakah set hloh lovin a chak ngei tura ngaih a ni hman hial tawh. German Zverev hian a serve a hum a nih chuan a chak tawh mai dawn. Hetihlai hian Alcaraz huaisenzia arawn lang ta thung a, pui zetin a khingpui a bei let. Dinhmun chhe taka ding tawh Alcaraz hian break neiin a serve a hum zui zel a, tie-break ah chiang taka chungnungin set a la ve ta hial.
Set a lak ve tak vangin Alcaraz a phur leh zual a, a khel tha tawh hle. Spaniar hian inrintawkna sang zawk neih bakah a phur hle tawh a, a hlah thei ta lo emaw tih tur a ni hial tawh. Hetihlai hian Zverev a buai tan a, hnual zawkah a tang emaw tih tur a ni hial tawh. Set linaah game an inlak chhawk zak zak hnuin Zverev hian mak tak maiin break a nei leh ta nawlh. Break pawimawh tak a neih hnuin a chakna turin a serve a hum ta hram a, tunhnaiah vawi thum ngawt a hneh loh zawn tawh Carlos Alacaraz lakah 6-1 6-3 6-7 (2-7) 6-4 in hnehna a chang a, semi-final a lut ta a ni.
Olympic champion Alexander Zverev hian semi-final-ah khingpui hautak zawk a hmachhawn zui leh dawn a, a ngam loh thin Daniil Medvedev a hma-chhawn zui dawn. Medvedev lakah hian vawi 7 a chak tawh a, vawi 11 zet tlawm zawkah a tang tawh. Zverev hmaa ding tur Medvedev hian quarter-final-a a khingpui Hubert Hurkacz chu 7-6 (7-6) 2-6 6-3 5-7 6-4 in a hneh.