Alcaraz hnehtu Dimitrov

Shanghai Masters khelh mekah top seed ni chunga inlan Carlos Alcaraz chuan last 16 a paltlang zo lo a, he stage atanga hnawt-chhuaktu hi Grigor Dimitrov a ni.
Tunhma lama Spaniard Alca-raz nen vawithum an intumah Bulgarian Dimitrov hi straight sets vekin a tlawm a, China ramah erawh world number two Alcaraz laka hnehna hmasa a sualchhuak ve ta hlawl a ni.
Kum 20 mi Alcaraz hian set khatna la turin game thum a chak zawn a, mahse, seeded 18th Dimitrov-a beilet hian 5-7 6-2 6-4 hneh-na changin, vawiin quarter-final inkhel pakhatah Chilean 22nd seed Nicolas Jarry a tum zui leh ang.
Kum 32 mi Grigor Dimitrov hi kum 2017 khan season-ending championship-ah a champion nawlh a, khami hnu khan ATP title a la zui leh ta lo vang vang a, Shanghai-ah hian rinkaiber a hneh miau avangin a lakah rinna nghah zui loh theih a ni lo ang!
Last eight match-a a tum leh tur Jarry hi kum 28 mi niin, hripui len hnua Shanghai Masters an khelh leh vawikhatnaah hian quarter-final lut turin last 16 lamah Argentina mi Diego Schwartzman chu 6-3 5-7 6-3-in a hneh.
Wimbledon champion Alcaraz lamah kirleh ila; Spaniard hian China ramah hian season kal laia a title pasarihna tur a beisei a, mahse, tunhma lama vawithum a lo hneh tawh Dimitrov lakah a mualpho a; Grand Slam title pahnih la tawh laka hnehna a chan hnuah Bulgarian chuan set thumna kha zawhte leh sazu te reuhte intawng ang vel a nih thu a sawi!
Quarter-final inkhel dangah Frenchman Ugo Humbert chuan minute 57 lek chhungin Ame-rican JJ Wolf lakah 6-2 6-2 hnehna awlsam a chang hman a; Russian 12th seed Andrey Rublev elawh American Tommy Paul inhmachhawn result erawh tarlan hman a ni lo.