Alcaraz leh Sinner an inhmachhawn dawn

French Open 2024 khelh mek chu a hot chho zel dawn a, mipa semi-final-ah tunlaia player tha pahnih; Carlos Alcaraz leh Jannik Sinner te an inhmachhawn dawn. Djokovic a tlak tawh vangin Alcaraz leh Sinner te inhmachhawn hi final aia ngaihven hlawh tur a ni a, an inkhela chak zawk zawk hi an champion zui a rinawm.
Grand Slam ah vawi hnih champion tawh a, World No. 1 pawh lo ni tawh Carlos Alacaraz hian thawhleh zan khan mipa lama player langsar zinga mi Stefanos Tsitsipas a hneh a, semi-final a lut. Alcaraz hian Tsitsipas lakah record a nei tha chhunzawm a, vawiruk an inhmachhawn tawhah a la hneh fai vek.
Spanish third seed Alcaraz hian a hneh than Greek ninth seed Tsitsipas lakah bul a tan tha a, set khatnaah break a neih a chhawr tangkai a, game thum chauh hloh chungin set a la. Set hnihnaah Tsitsipas a khel tha hret a, inkhel a hmuhnawm ta viau. Set hnihnaah hian tie-break khelh a ni a, awlsam takin Alcaraz a chak zui leh. Greek tlangval lakah set hnih a lak zawn hnuin Alcaraz hian set thumnaah break pawimawh tak a nei zui leh a, 6-3 7-6 (7-3) 6-4 a hnehna changin semi-final a lut. Alcaraz hian French Open 2023 khan semi-final a lut tawh a, hliam tenauin a tihbuai vangin Djokovic a hneh lo. Inelna kal mekah champion tumin thapui tak meuh a chhuah zui ang.
Tsitsipas lakah set hloh lova Alcaraz a chak lai hian World No. 1 thar tur Jannik Sinner chuan Bulgarian 10th Gigor Dimitrov lakah set hloh lovin hnehna a chang ve bawk a. Carlos Alcaraz hmachhawn turin semi-final a lut.
Australian Open champion Sinners hian player tawnhriat ngah Dimitrov lakah tha takin bul a tan a, set khatnaah game hnih chauh hloh chungin set a la. Set a lak hnuin set hnihnaah break pawimawh tak a nei a, set a la zui leh. Set thumnaah tie-break khelh ngai bawk mah se awlsam takin a chak zui leh a, 6-2 6-4 7-6 (7-3) a chakin semi-final a lut ta a ni. Sinner hian French Open-a a thlen san ber tum a tawng a, World No. 1 thar a ni dawn bawk nen phurna namen lo nen Alcaraz a hmachhawn thei dawn a, final lut turin inrintawkna sang tak a nei ngei ang.
Alcaraz vs Sinner
Carlos Alcaraz leh Jannik Sinner te hi tunlaia player langsar pahnih an ni a, hmabak an nei eng dun hle. Roger Federer, Rafael Nadal leh Novak Djokovic te an chuai lamah an rawn chawrchhuak. Grand Slam-ah an champion ve ve a, World No. 1 an ni ve ve bawk. Kum la naupang deuh zinga player tha fal pahnih an ni a, an pahnih hian an inhnehtawk em em bawk a, an inchungnung chhawk zak zak a ni ber mai.
Alcaraz leh Sinner te hi vawi 9 an inhmachhawn tawh a, Alcaraz a chungnung hret a, vawi 5 chak zawkah a tang tawh. Sinner hi vawi li chak zawkah a tang ve tawh a, French Open semi-final-ah a chak a nih chuan 5-5 in an inhnehtawk lehchiah ang. Zanina an inkhelhna tur Clay ah hian vawi hnih an inhmachhawn tawha vawi khat ve ve chakin an inhnehtawk. An intum hnuhnung ber chu March 2024-ah niin, Indian Wells semi-final-ah a ni a, hemi tum hian Alcaraz hian 2-1 in hnehna a chang.
Alacaraz leh Sinner te hi an kum a la naupang a, an fit dun em em a, thiamna ril tak an nei dun bawk a, inkhel hmuhnawm tak an phochhuak thin. French Open semi-final-ah an intum dawn a ni a, inkhel hmuhnawm a ni ngei a. Anni pahniha chak zawk zawk hi French Open champion thar an nih ngei a rinawm.