Alex Warren ‘Ordinary’ kar 9 a No.1 tling ta
Alex Warren ‘Ordinary’ kar 9 a No.1 tling ta
Alex Warren hla hit ‘Ordinary’ chu Billboard Hot 100 chart No.1 atanga nawr sawn thei hla dang a la rawn chhuak rih lo a, he chart-ah hian kar kua a No.1 tling ta a, hetihrual hian KPop Demon Hunters soundtrack hla pahnih chart top 10-ah a la lang bawk.
Billboard Hot 100 (singles) chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘Ordinary’ hi Alex Warren hla he chart-a No.1 kai thei hmasa ber niin, tunah hian kar khat chhungin stream maktaduai 19.4, radio airplay ngaithlatu maktaduai 73.3 leh sales 6,000 a la nei thei a, hei hi a kar kua nan chart-ah a No.1 pui leh ta a ni.
KPop Demon Hunters soundtrack HUNTRIX (EJAE, Audrey Nuna & REI AMI) “Golden” chu stream 13%-in a pung a, maktaduai 28.9 a tling a, radio airplay ngaithlatu maktaduai 4.9 neiin, sales 5,000 a tling bawk a, hei hi chart No.2-ah bawk a awmpui leh ta a ni.
Chart No.1 hlui Morgan Wallen “What I Want” featuring Tate McRae chu No.4 atangin No.3 a kai thar leh ta a, Justin Bieber “Daisies” chu No.2-ah a debut hnuah No.3 atangin No.4-ah a tawlh ve thung a, Morgan Wallen hla dang “Just in Case” chu No.5-ah bawk la awmin, Ravyn Lenae “Love Me Not” pawh No.6-ah bawk a la awm.
Chart No.1 hlui, Teddy Swims “Lose Control” chu No.7-ah bawk a la awm a, he hla hi chart top 10-ah kar 72 a lang tawh a, Hot 100 chart top 10-a lang rei thei ber record a siam a sawngheh belh zel a, top 10 chauh ni lo, chart a lan hrim hrim pawh kar 102 a tling tawh a, Hot 100 chart-a lang rei ber record a siam pawh a sawh nghet telh telh bawk.
He chart-a No.1 ni rei lamah record siam thei, kar 19 chart No.1 ni thei Shaboozey “A Bar Song (Tipsy)” chu No.8-ah bawk a la awm. He hla pawh hi nikum July atang khan chart-ah a la lang ta char char a ni.
KPop Demon Hunters soundtrack dang Saja Boys (Andrew Choi, Neckwav, Danny Chung, Kevin Woo & samUIL Lee) “Your Idol”-in stream maktaduai 19 niin, No.12 atangin No.9 a rawn kai thar leh a, heti hian Hot 100 chart top 10-ah film pakhat atangin soundtrack pahnih a lang thei a, 2022-a Disney film ‘Encanto’ hnuah hetiang ti leh thei hmasa ber a ni.
Hot 100 top 10 khartu chu chart No.1 hlui Lady Gaga leh Bruno Mars “Die With a Smile” niin, No.10-ah bawk a la awm. He hla hi January khan No.1 kaiin, kar nga a No.1 thei a ni.