Alphabet a let zawnga type rang

Telangana State High Court a advocate practice lai SK Ashraf chuan computer-ah a let zawnga alphabet type rang ber record siam tumin a bei a, second 2.69 chhungin a type chhuak hman. Guinness World Record-in hetiang record-a a pawm lai chu second 3.71 a ni a, he record hi a rawn khum a, mahse, a record siam hi Guinness-in official-in an pawmpuina an la puang lo.
Ashraf hian Telangana High Court Advocate Bar Association Hall-ah record siam tum hian a bei a, an association president hlui V Raghunath, executive committee, HC Sports & Cultural secretary Sharada Katakam te pawh a record siam hriatpuitu zingah an tel.
Ashraf chuan, “’Alphabet a let zawnga type rang ber’ title ka duh a, second 2.69 leh second 2.78 ka thehlut a, Guinness World Records-in a second tlem zawk 2.69 hi an pawm ka beisei,” a ti a, “Record ka siam lai hi viceo-a lak a ni a, video te pawh Guinness World Records headquarter-ah kan thawn tawh,” a ti a, record hi January ni 29, 2024 tlai dar 4 khan a siam a ni.
Ashraf hian record dang pawh a lo siam tawh a, ‘alphabet a kara space awmin A atanga Z thleng type rang ber’ niin, second 3.37 chhungin a type hman a, hei bakah hian mit tuam chungin second 4.13 chhungin alphabet A-Z a type zo hman a, hei hi record niin, second 14.88 chhungin number 1-50 a type hman a, hei pawh hi number 1-50 type rang ber record a ni bawk.