Amah dawr tha lova puhin Banerjee-in CEC a chhuah tauh san

West Bengal Chief Minister Mamata Banerjee-i chuan Chief Election Commissioner (CEC) Gyanesh Kumar-a chu a pisaa an kawmnaah ‘amah hmusit, zah lo leh nuihzat taka chea puhin’ a chhuah tauhsan.
New Delhi-a CEC pisaah hian Banerjee-i hi a kaihhruai Trinamool Congress (TMC) party aiawh dangte nen Thawhtanni khan an leng a ni.
“CEC hi kan boycott a, kan chhuahsan. Hmuhsit, zah loh leh nuihzat kan ni a, hetiang CEC hi ka la hre ngai lo. A induhin a chapo em em a, chhe takin min lo dawr a. Dikna duhin kan dawr a, dikna kan hlawh ngai lo,” tiin Banerjee-i hian Election Commission of India (ECI) headquarters, Nirvachan Sadan atanga an chhuah tauh hnua thuthar lakhawmtuten an lo kawmnaah a sawi.
“CEC tam tak – SY Quraishi leh TN Seshan te pawh ka lo hmu tawh a. An chak a, eng political party tan mah vaki an ni ngai lo va, an pute aw mai an ni ngai lo,” tiin a sawi.
Banerjee-i hi TMC National General Secretary Abhishek Banerjee leh MP Kalyan Banerjee bakah West Bengal-a ‘SIR tuartu chhungkaw member’ tia an sawi mi 14 niin CEC hi an lenchilh a ni.
Banerjee-i leh TMC hian an state-a ECI-in electoral roll Special Intensive Revision (SIR) a kalpui mek chu tawptir an duh a, tuna an kalpui dan hi ‘vote nei tam tak neih lohtirna’ leh ‘mipui rorelna lungphum beihna’ niin an sawi a. Banerjee-i hian ECI hi dan dik lova thil kalpui, thil kalpui dan tur zawm lo leh inrelbawlna fel fai lo tiin a puh bawk.
ECI thuneitute chuan CEC hian Banerjee-i zawhna leh hriat duhte tha takin a lo hrilh a, Nirvachan Sadan a chhuahsan thut niin an sawi ve thung.
CEC hian TMC aiawhte hi ‘dan ang tak zelin thil tih a ni dawn’ tih a hrilh a, commission-in dan leh thuneihna a neih ang zelin mahnia thua dan lo lekkawh ve ngawtte lakah hma a la zel dawn tih a hrilh bawk niin an sawi.
Commission hian TMC party worker-ten ERO (SDO/BDO) pisate an suasam niin an sawi bawk a, hetianga tihbuaina leh nawrna hi SIR kalpuinaah thleng tur a ni lo tih a sawi bawk.
Banerjee-i chuan TMC hian ECI hi an bei zel dawn a, kumin kum tawp lama an state assembly inthlan tur chu an boycott dawn lo tih a sawi bawk a. “ECI hian assembly inthlan hmain thla ruk chhung hun a la nei a. Sorkar hi hna an thawh a phalsak lo va, kan state-ah President’s Rule hman hial pawh an tum thei,” a ti.
Hetih lai hian Thawhtanni khan Kolkata-ah Suvendu Adhikari-a hovin BJP aiawhte chuan Governor CV Ananda Bose-a an hmu ve bawk a, TMC chu hearing centre-ah buaina siam zawnga chea puhin an thlen.
Adhikari-a chuan, “SIR hi vawi khat kalpuina pawh a ni lo va, tihtawp a duh a; mahse, a hlawhtling thei si lo. A lem, awm nawn leh voter thi, Bangladeshi leh Rohingya voter list a awm thei lo va. A duh ang tawkin a au vel mai mai a ni,” tiin a sawi.
Banerjee-i hian Pathianni khan an state-a SIR kalpui chu tihtawp a nih theih nan Supreme Court-ah petition a thehlut nghe nghe a ni.