AMC-ah dan dik loin hna an la – ZPM Thalai

AMC-ah dan dik loin hna an la
– ZPM Thalai
Aizawl Municipal Corporation-a MNF sawrkar hnuaiah advertisement chhuah loa a ruka duhsak bikte tan hna lak a ni tih ZPM Thalai chuan an sawi a. A rang thei ang bera tihtawp an duh tih an sawi.
ZPM Thalai Hqrs. thuchhuak chuan, Assembly Sesison-a UD&PA minister Pu K Sapdanga’n zawhna a chhannaah, AMC term kal mekah advertisement chhuah loha hna lak 5 – consultant geologist 3, veterinery officer 1 leh project assistant AMRUT 1 a awm tih a sawi.
Tun AMC term tawp dawna AMC Executive Committee thukhawm chuan advertisement chhuah loin casual worker 8 lak a tum leh a, heng zingah hian corporator fate pawh an tel tih an hriat thu sawiin, duhsakna uchuaka hna lak hi MNF leh MPCC corporator-te inthuruala hmalakna a ni tih hriat a ni tih a sawi bawk.
‘Hetianga a ruka hna lak MNF sawrkarna AMC-a a awm hi pawi kan ti a. Hna lak chungchangah thalaiten kan dikna chanvo kan hmuh theihna tura ZPM sawrkarin theihtawp chhuaha dik leh fel taka hna lak a tum mek lai a, MNF sawrkarna AMC-a diklo leh fello taka hna lak tum hi, AMC-ah MNF chu sawrkar siam zui tlak a nih loh zia a tichiang a. MPCC corporator-te nen an inthurual lehzel hi a pawi a, duhsak zawngte tana a ruka hna lak tum hi kan dodal dawn a ni,’ a ti.
Heng mi 8 lak tumte hi titawp nghal turin ZPM Thalai chuan AMC a hriattir tih a sawi a. An titawp lo a nih chuan an nihna nen an tarlang dawn, tiin, tun hnuah dan dikloa hnalak ching tawh lo tur leh advertisement chhuaha hna la tawh turin an hriattir tih a sawi a ni.