Retailer leh ration card-ah inthliar lo Card sen-a awm tur chi report ang u – FCS&CA minister
Retailer leh ration card-ah inthliar lo
Card sen-a awm tur chi report ang u
– FCS&CA minister
Retailer thlan kawngah leh ration card neih chanvo chang turin party inthliarna a awm lo tih Supply minister B Lalchhanzova chuan a sawi a. Khawsak harsa, card var-a la awm chu card sena an awm theihnan MLA-te pawhin an bial chhung mi ngaihven pui turin a ngen tih a sawi.
Ningania Assembly Session-a zawhna a chhannaah FCS&CA minister chuan, an sawrkar a pian tirh atangin term hmang zo loa retailer thlak an nei loa, an term an hmang zo vek tur a ni tih chu an dinna ngai reng a la ni tih a sawi. Retailer-ah eng party nge awm tam tih sawrkarin a hre loa, dan ang takin an term an hman zawh zel angin an awm a, advertisement hmangin retailer thar an la zel tih a sawi a ni.
Ration dawn chu mipui chanvo a nih angin, ration card dil lo pawh, khua leh tui an nih chuan automatic-in ration card an nei a, ration mamawh ve lote tih loh chuan automatic-in Fair Price Shop atangin buhfai an la mai zel tih a sawi.
“Party inthliarna anga buhfai dawn theih dan thliar – categorization hi ZPM sawrkar hnu ah a awm thar thut ka hre loa, hei hi chu hnuhma tha lo kan chhawm zel, lo la chambang a awm a ni maithei,” a ti.
National Food Security Act dawng tur hian Aizawl pawnah phei chuan mamawh an tam a, mamawh theuh theuh, rethei ve ve pakhatin card pawl hman a, pakhatin card var hman chu dik an ti loa, MNF leh INC mi chanvo an chan tur ang chan loh tir tih chu an beng a thleng lo tih B Lalchhanzova hian a sawi. “Khaw tinah NFSA-a awm tur ngaihtuahtu Committee an awm a, card var nei zinga dinhmun la harsa deuh phei chu card sena dah hi sawrkarin a ui lo. Harsa na na na chuan an chanvo an chang mai tur a ni a, sawrkarin card sena dah luh vek a duh a ni,” tiin MLA-te pawh an bialah hetiang mi an awm leh awm loh ngaihven turin a ngen tih a sawi.
Card sen hmangtu mi 70000 vel an awm a, mi nuai 11 vel ration card nei zingah zaa 30 aia sang lo card var-ah awm se, a bak zawng chu card eng, pawl leh senah awm se tih chu tuna an ruahman dan a ni tih a sawi bawk.