AMC-in fund a dawn tur MNF-in ngaihven lohin a lo dah mai mai – Lalthansanga
AMC-in fund a dawn tur MNF-in
ngaihven lohin a lo dah mai mai
– Lalthansanga
MNF kaihhruai Aizawl Municipal Corporation chuan central atanga an fund dawn tur ngaihven lohin an lo dah mai mai a, a tawp khawkah chief minister hoin an zuk nawrchhuah sak niin minister Lalthansanga chuan a sawi.
Thawhlehnia ZPM |halai Hqrs buatsaih AMC inthlanpui atana street campaign neih a hmanpuinaah ZPM hruaitu ni bawk Lalthansanga hian, MNF AMC khan Tuiriala bawlhhlawh paihna tur sum tam tak senna pawh an tihhlawhtling thei loa, central atanga Aizawl khawpui fund dawn tur pawh ngaihven lohin an lo dah mai mai a, hun tep ter tawh tak, last minute ah chief minister Pu Lalduhoma leh Mizoram Youth Commission chairman Pu Malsawmzuala ten hma lain cheng vaibelchhe 45 an um chhuah sak niin a sawi.
Minister PC Vanlalruata pawhin, AMC hi term thum ral tawh mah se, Aizawl khawpui tana ro tling hnutchhiah sawi tur a tam lo hle tih sawiin, Aizawl khawpui enkawlna atan sawrkar laipui atangin vaibelchhe engemawzat UD&PA department kaltlangin an dah mek tih a sawi.
Kawngpui tha kan neih tak avanga lawm chuang lo, sawrkarin thil tha a tiha rilru lo na an awm thin tih sawiin, “Sawisel lamah nasa takin tang hle mah se, ram tana thil tha a nih chuan kan ti zel dawn,” a ti.
Minister Dr Vanlalthlana chuan, sawrkar kalta zingah MNF-in an kuh mumah ZPM sawrkar a par tia an sawi thin thu sawi chhawngin, “An sawrkar laiin qualified lo zirtirtu lak an ti par a, kuthnathawktute hlamchhiah an ti par a, hnathawh hma hauha sum lo lak an ti par a, dan loa kuhva tawlhruk an ti par a, thil dang tam tak an sawrkar chhung khan ram tana tha lo an lo ti par. An par dan a dang em avangin mipuiin thutlukna fing tak siamin an paihthla ta a ni,” a ti.
Tunah AMC campaign-na atan an rawn kuh mum leh tan tih sawiin, AMC-a an sawrkar hmasaka an manisfesto hlawhtling lo bawk kha manisfesto-ah an rawn ti kuh mum leh mek tih a sawi a. Aizawl tha zawk, inrelbawlna mumal zawk, corporator eiruknaa fihlim, AMC hmel thar lan chhuahtir turin ZPM candidate zawng zawng Aizawl mipuiin vote pui turin an sawm tih a sawi a ni.