AMC inthlan har chhanah sawrkar puh

AMC inthlan har chhanah sawrkar puh
Aizawl Municipal Corporation inthlanpui a huna neih loh chhanah state sawrkarin a la hmachhawn ngam loh vang mai ni ah an ngai nghet tlat tih Congress Thalai chuan an sawi.
Congress Thalai Hqrs. thuchhuak chuan, ZPM sawrkarin mipui an zah loh zia lantirnan Aizawl Municipal Corporation term tawp tawh, extend-na dan pawh awm loin, Mizoram khawpui Aizawl chu enkawltu mumal awm loah a dah mek a, hei hi AMC inthlan a hun taka an hmachhawn ngam loh vangah a ngai tih a sawi.
Hriat theih chinah state Assembly Session, school naupang exam avangtea AMC inthlan sawn hlat a la awm loh laiin, an chan thatna tur a nih chuan village council leh local council inthlan pawh mipui thlan chhuahte term pawhtawi sak avanga court hial kal ngai khawpin inthlan hun an lo sawn hma tawh tih a sawi a. Tunah a hun takah AMC inthlang thei loin an chan that hun nghakin an sawn hla leh ta chu phuahchawp sawrkar an nihna leh kalphung thar rintlak loh zia tichiangtuah a ngai tih a sawi bawk.
ZPM chu an sawrkar hnuah LADC, Dampa MLA by election, VC leh LC inthlan an hmachhawnah an chechhe em em vek tih Congress Thalai hian sawiin, ‘An sawrkar hnuah budget vawi thum an pharh tawh a, thal vawi hnih kawng an siam loa, AMC inthlan dawnah inthlan thlir (orient) in mipui rilru suknan Aizawl khawpui kawng siamthat a, pukchawpa sawhthing tlem azawng lei hman hram leh Budget Session-a mipui mit leh bengkhawn zawnga chet hnua AMC inthlan an duh vang mai maiah kan ngai,’ a ti.
AMC chu a kalphungah chuan kum 5 chiah zelah a tawp a, kum 5 chiah zela a term pawh a thar piang zel tur a ni, tiin, a hun taka office pawh luah chat chat tura ngaih an ni tih a sawi. ‘A huna inthlan theih loh a awm thei a, mah se, hei hi danbu ah a lang lo a, chu’ng danbu-a lang lo, inthlan ti danglam thei chu pandemic emaw epidemic emaw national level or state Level buaina a ni tur a ni,’ thuchhuah hian a ti.