AMC inthlan March hnulamah

Aizawl Municipal Corporation inthlanpui neih hun tur chu kumin April- May chho lamah a ni dawn tih State Election Commissioner Dr H Lalthlangliana chuan a sawi. Zirtawpnia thuthar thehdarhtute a kawmnaah commissioner chuan, AMC 2026 inthlanpui neih hun tur chungchangah zawhna an dawng tam a, political party lam pawhin an ngaihven a, chhan hrang hrang avang leh inthlana buai ber tur sawrkar hnathawkte hun neih dan thlir chungin, AMC term kal lai tawp hmaa inthlan buatsaihna hun a awm dawn lo tih a sawi.
“February-ah Assembly Budget Session neih a ni anga, sawrkar kumtawp khar a hun dawn bawk nen a, hengah hian a buai ber chu sawrkar hnathawk an ni. Inthlan hi a pawimawh a, a buaipui chhung hi kum khat dawn a awh lo thei loa, inthlana kan hman tur berte hi sawrkar hnathawk tho an ni. Aizawl chauh a ngaihtuah theih loha, state pum ‘interest’ en tel a ngai,” tiin February leh March chhoa AMC inthlan buatsaih theih a nih loh chhan a sawi.
Hemi rual hian MBSE hnuaiah Board Exam a awm dawn a, zirtirtute chu inthlana hman tangkai an nih ve tho rualin, hei erawh chhuanlam ber a tling loa, a tul chuan Board Exam ni chu siamrem a ni mai thin zawk tih a sawi bawk.
Hei bakah hian AMC inthlanah electronic voting machine hman ngei a ngai a, Lai Autonomous District Council inthlanah EVM hi hman a ni a, Election Commission danah EVM hi hman a nih atanga ni 60 chhung chu khawih chet/ nawhreh theih a ni loa, LADC inthlan (2025 December 3) atanga chhutin January velah emawa inthlang tur chuan a chawpchilh hle tih Dr H Lalthangliana hian a sawi. AMC inthlana atana hman tur electoral roll siamthat hi a behchhanah 2026 January 1, tih a lo ni bawk a, January 7 khan an inpeih fel chauh a, a chawpchilh hle tih a sawi a ni.
“Heng avang hian AMC inthlan hi April emaw, May thla tir lam emaw a ngai dawn a ni,” a ti.
AMC term chu a tir lam atangin term tawp hma emaw tawp rual emawa inthlan a ni ngai meuh loa, tuna an siamrem hi nakin zelah a dik phah theih beisei a ni tih a sawi bawk.
Zawhna chhangin commissioner chuan, inthlan hun ruat chungchangah hian state-a sawrkar lai an inrawlh loa, a nihna takah chuan ruling party hi neih hma duh zingah an tel zawk tih a sawi. Corporator-te term a tawp hunah chuan AMC chu administrator/ caretaker hnenah an awm mai anga, sawrkarin Municipal commissioner emaw district bawrhsap emaw, a duh zawng dang pawh a ruat thei tho tih a sawi. SEC leh sawrkarin Municipal term pawhtawi emaw pawhsei theihna an nei lo tih a sawi a ni.