AMC inthlanpui pawh tlai chhan chhuanlam tling lo – MPCC thupuangtu

AMC inthlanpui pawh tlai
chhan chhuanlam tling lo
– MPCC thupuangtu
State Election Commission-in Aizawl Municipal Corporation inthlanpui 2026 a pawh tlai chhana a chhuanlam chu thu tling lo niin, tunhnai inthlana sawrkar lai ZPM an chet chhiat vang ni ber zawka a lan thu Congress thupuangtu Dr Lallianchhunga chuan a sawi.
MPCC thupuangtu chuan, AMC term dinglai thiat a, administrator ruat ngai hiala inthlan tih khawtlai chu democracy kalphung palzutnaah an ngai tih sawiin, Dampa bial by election-a an chak loh avang leh LADC inthlana pathumna an nih avangin ZPM sawrkar hnuaiah AMC inthlan hi a hun taka buatsaih tumna a awm lo sa hrim hrim niin an ngai tih a sawi a ni.
“AMC term kal mek hi 2026 March 1-ah a tawp dawn tih hi a tir atanga hriat sa vek a ni. Hei vang hian March 1 hmaa AMC inthlan process zawhfel vek a, AMC sawrkar thar din hman a nih theihna turin SEC pawhin inbuatsaihna a kalpui. Hmeichhe ward tur pawh 2025 May 30 khan a tifel daih tawh a, AMC final electoral roll hi 2026 January 7 khan tar chhuah a ni tawh bawk. AMC inthlan buatsaihna tur leh AMC sawrkar thar din a nih theihna atana tih tur tul ang ang chu SEC hian a peih vek tawh,” a ti.
Tunhnai inthlan hoah ZPM an chet that loh avangin SEC chu AMC inthlan a tihkhawtlai tir tih chu mipui rin dan a ni a. AMC inthlan tihkhawtlaina atana chhuanlam an tarlan chu state sawrkarin a chinfel theih vek thil a ni tih a sawi a ni.