America rama World Cup venhimna kungpui tur ICE!

Donald Trump lal nawn leh hnua dan loa United States lut leh khawsate dapchhuaha thawnhaw kawnga che rawva tak, an kut zala tualchhung mi nghette ngei ngei pawhin kut an tawrh a, nunna hial an chan chhoh tak zauh zauhna US Immigration and Customs Enforcement (ICE) an tihte chu kumin nipui thawt laia ram pathum inthlentawm tur Fifa World Cup-ah hian United States bikah venhimna pawimawh tak an chelh dawn!
ICE hotupa Todd Lyons leh senior official dangte chu tunhnai khan House committee-ah lawmaker-te’n America ram chhung himna (homeland security) chungchangah thu an zawt a, hei hi a chhan chu Minneapolis state-a US President Trump-a’n mikhual dapcvhhuah runpui a kalpui denchhena ICE agent-te’n American khua leh tui mi pahnih an kaphlum vang kha niin, he hunah hian ICE hotupa Lyons chuan congressional committee hnenah an agency chu kumin WC overall security mawhphurhna kengkawhtu tur an nih thu a hrilh.
ICE agent-te kuta tunhnaia nunna chante kha Alex Pretti leh Renee Good-te niin, kha inthahna avang han America ramah inhnialna lian tak a chhuak a, American mipui tam zawk an thinrim a, Trmp-a kutke lian ber ICE hnawk tihna leh thiah duhna thawm a ring tawh hle a ni.
Chu chu hmaituam police an tih mai ICE dinhmun a nih tawh lain an rama World Cupo match an khelh turho venhimna chungchanga mawh lian ber latu tur an han la ni zui leh phei hi chu ei lo fe fe an tam hle dawn niin a lang!
Thla hmasa mai khan fan group pakhat Football Supporters Europe (FSE) an tihte chuan BBC Sport hnenah North America khawmualpuia kumin World Cup an nghah tur chungchangah thawm neiin, US leilung bika tunlaia sipai hrohrang na tak ang maia police force inlar mekte’n venhimna lam an thlurbing tur an ngaihmawh thu an sawi!
European Democratic Party (EDP) lam pawh an ngawi mai mai thei bik lo a, an national football federation theuhte chu America leilunga himna a chiangkuan loh dawn chuan tournament khelh tur atanga iinpuchhuak mai turin thurawn an pe!
Ram leh ram politik thil avangin tunlai hian Europe leh America meuh pawh an inep ta ut ut fo mai a, Donald Trump-a a lal meuh chuan inthiantha kumkhua Europe leh America boruak pawh a alh chhuak pup lo chauh a ni ta a, chutih laia Trump-a sipai an tih maiin inkhel pawimawh ber ber an nghahna tur America leilunga Wotld Cup an thutchilh tur chu Europe lam pawh hian an helh nghal ul niin a lang!
Fifa lam pawhin thawm an chhuah vat a, fans leh tournament khel tur team-te himna chu an ngaihpawimawhber a nih thu leh himna chungchanga tualchhung lam thuneitute an biakpawh reng thu an tarchhuak nghal a; venhimna lam buaipuitute chu hnai taka an thawhpui reng thu leh him taka tournament khelh a nih theihna’na ruahmanna leh thawhhona tha kalpui reng tura an chah thu thuchhuah siamin an tarlang.
Tournament thlengtu pui ber tur US leilungah hian khawpui 11-ah match 78 khelh a ni dawn a, East Rutherford, New Jersey, United States-a an khelmual hmingthang MetLife Stadium chu final match khelhna tur ni nghe nghein, co-host dang pahnih Canada leh Mexico-in match 13 ve ve an chang ve bawk ang.