Amsterdam-ah mi pali vit, a titu bei letin man

Amsterdam-ah mi pali vit, a titu bei letin man
Netherlands khawpui, Amsterdam lailiah Ningani khan mi pakhatin chema mi beiin mi pali a vit hliam niin Dutch police-in an sawi a. A titu nia sawi hi a bul hnaia miin bei leta man betin police-in an la zui.
Police hian a tirah chuan a titu nia puh hi a inhliam ve avangin mi panga hliam angin an sawi.
Engvanga hetianga che mai nge a nih hriat theih a la ni chiah lo va, police hian an chhui zui mek.
“Vawiin chawhnu dar 03:50 (India-a zan dar 08:20) vel khan Saint Nicolaasstraat-ah invihna a thleng a. Mi pali an inhliam a, a titua rinhlelh hi man nghal a ni a, ani pawh a inhliam,” tiin police thupuangtu chuan thuthar lakhawmtute hnenah a sawi.
Thil thlenna hmuna lo awm ve pakhatin mi vittu hi bei letin a man bet a, hetah hian a ke-ah hliam a tawrh phah niin police chuan X-ah an tar lang.
An mi man hi ‘damdawia enkawl niin thu zawh fiah zui a ni dawn’ tih police thupuangtu chuan a sawi bawk.
Police hian Dam Square bula pawi khawihna hmun hi an khar nghal a, square-ah hian trauma helicopter tumtir niin hliam tuarte hi damdawi inah a phur.
AFP chuan a hmun atang hian hliam tuarte chu phurh chhuah tawh ni mah se police tam tak an la awm a, ambulance-te pawh an la inrintir niin a sawi.
Police thupuangtu hian hliam tuarte dinhmun chiah a sawi thei lo va. Tual chhung news agency ANP chuan a hmain mi pakhat, hlanga zawna ambulance hnunga an hlang lut lai thlalak erawh a tichhuak.
Sorkar thupuanna, NOS pawhin police-in hlanga mu tu emaw an nam lai thla a tichhuak a, intravenous drip an khai bawk.
Tual chhung chanchinbute chuan inbeihna a thleng tih thu a hriat rualin Amsterdam Mayor Femke Halsema-a chuan town hall-a meeting pawimawh a neih lai a kalsan nghal niin an tar lang hlawm.
Police chuan tute pawh he thil thlen lai thlalak lo nei fuh chuan finfiah nan pe turin an ngen a. Chhuinaa harsatna a awm loh nan thil thlenna hmuna la kal rih lo turin an ngen bawk.
Thil thlen lai hmutu, Marco Schoenmaeckers chuan hliam tuar pakhat vih lai a hmuh thu tual chhung chanchinbu, Het Parool hnenah a sawi a. “Centimetre 10 (inche li dawn) hmangin hmeichhe naupang hnungzang, a dar lehlam lehlam inkara a vit lai ka hmu,” a ti.