An camp-ah Nigeria sipai 20 that

ISIL-a inziak luh, West Africa Province (ISWAP)-a firfiak pawl ni ngeia hriatten Nigerian sipai 20 vel an that.
A beitute hian hmarchhaka Borno state-a khaw kilkhawr tak, Malam-Fatori khuaa sipai camp hi Zirtawpni khan an thunun a, a dam chhuak sipai chuan darkar thum chuang an inbei niin a sawi.
Boko Haram leh ISWAP fighter-te hi Borno-ah hian an tam a, venhim hna thawktute bakah civil mite beiin an that a, mi sang tam tak an tlanchhe mek.
Reuters news agency chuan Niger nena an inrina, Malam-Fatori-a 149th Battalion beihnaa sipai thi zingah hian commanding officer pawh a tel tih venhim hna thawktuten an sawi tih a tar lang.
Malam-Fatori-a mi cheng, inkahna avanga khua chhuahsan thenkhat chuan a beitu thenkhat hi Inrinni zan thleng khan khuaah hian an la awm niin an sawi.
Sipaite puitu tura tual chhing mi awm, Malakaka Bukar-a chuan firfiakte hian chenna in pawh an hal a, mi chengte chu tlanchhe lo thei lovin an siam tih a sawi. ISWAP hi kum 2016-a Boko Haram atanga peng niin tunah hian Nigeria hmarchhak ram zau tak an thunun.
Sipaiten nasa taka an beihna leh an pawl chhunga innghirnghona awm avangin Boko Haram leh ISWAP hi an chak lo ve hret hret a; mahse, kumin kum thar atangin Borno-ah hian an che nasa thar a, lo neitu leh sangha mantu tam tak an that leh tawh.
Nigeria hmarchhaka kum 15 chhung zet buaina avang hian mi 40,000 dawn an thi tawh a, mi maktaduai hnih vel baihvaiin an awm mek. Buaina hian an thenawm – Niger, Chad leh Cameroon pawh a kangkai a, tangruala hel beihna pawh an din phah a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More