An chhungte chhuah loh chhan leh indo tawp theih loh chhan berah PM Netanyahu puh

An chhungte chhuah loh chhan leh indo tawp theih loh chhan berah PM Netanyahu puh
Hamas-in an la hren Israeli chhungkte chuan an lainate an la haw theih loh chhan leh inremna a la awm theih loh chhan ber chu Prime Minister Benjamin Netanyahu-a a nih thu an sawi.
Hostages & Missing Families Forum: Bring Them Home Now chuan social media-ah Israel-in kar hmasaa Qatar a kap chu ‘inremna a awm theih nana hma lakna a awm apiangin Netanyahu-a’n a tikhawlhkham ziah’ tiin an tar lang.
He pawl hian Israel-in Hamas hruaitu hlunte beia Qatari khawpui, Doha a kah kha an sawi a, he thilah hian mi panga an thi niin Hamas leh Qatari hotuten an sawi.
Inrinni khan Netanyahu-a chuan Qatar-a Hamas hruaitute chu mi hren chhuah leh indo tawpna tur ‘daltu lian ber’ an nih thu a sawi ve thung a. Hamas chuan Gaza-a indo a tawp nana inkahhai tumna apiang an dang niin a sawi a ni.
US Secretary of State Marco Rubio-a chu Inrinni khan Israel pana zin chhuakin Israel-in Qatar a kah avanga khawvel demna an tawn mek karah Netanyahu-a nen pawh an inbia.
Hetih lai hian mi hren chhungte chuan Israeli prime minister ber chu an lainate hruai hawna tura ‘chhuanlam siam zelah’ an puh.
“Qatar kah a ni hian mi hren 48-te an lo haw theihna tur leh indo a tawp theihna tura mutan ber chu pakhat chauh, Prime Minister Netanyahu-a chauh a ni,” an ti.
“Thuneihna a chan zel theih nana chhuanlam siam chu tihtawp hun a ni tawh,” an ti bawk.
An pawlchuan Netanyahu-a’n thil a ‘tikhawtlai’ zel chuan ‘mi hren 42-te nunnain a tawrh phah bakah la dam hrem hram dangte nunna pawh a tiderthawng’ an ti bawk.
Rubio-a’n an ram a chhuahsan hmain US President Donald Trump-a pawh Qatar kah a nih avang hian a lawm lo hle tih a sawi a, hetih rual hian US-Israeli inkar erawh ‘a la tha em em’ tih a sawi.
“Kan hriat khan kan lawm lo va, president pawh a lawm lo va. Tunah hian hma lam pana kan kala eng nge a dawta awm leh tur kan ruahman chhuah a ngai a ni,” a ti.
Trump-a ngaih pawimawh ber chu mi hrente him taka an haw leh leh Gaza-a indo tihtawp a la ni reng tih Rubio-a chuan a sawi bawk.
Doha kahin Qatar leh US thawhhona a tichhe thei dawn em tih zawhna chu Rubio-a chuan, “Thil hrang hrangah inkawp tha tak kan ni,” ti chauhvin a chhang.
Qatar hi Middle East-a US kawppui nghet tak niin American air base lian tak pawh a awm a ni.
Netanyahu-a chuan Qatar an kah kha October 7, 2023-a an ram beihnaa ruahmanna leh bultumtu Hamas hruaitute beihna a nih thu a sawi.
Israel hian Hamas-in an ram chhim lam beia mi 1,200 chuang an thah leh hren tura mi 251 an hruai hnuah Gaza-a Hamas-te a bei zui nghal a, ram pawn thlengin a um zui zel a ni.
Gaza-a Hamas chhut chimih tuma beihpui a thlak mek zelah mi 64,605 an thi tawh a ni.