Pathianni zan khan English Premier League khelh chhunzawm a ni a, Manchester United chuan an chunga awm Fulham lakah hnehna an chang. United an chak lai hian team lian Tottenham an talbuai chhunzawm thung a. Spurs manager Ange Postecoglou hma lam hun a chiang lo thar leh zual.
14-naah awm mek Manchester United hi Fulham hmachhawn turin Craven Cottage-ah an leng lut. An len luhna mualah goal an thun thei lo rei hle a. Hun tawp dawn hnaiah vanneihthlak ang reng takin hehna an chang. An hun tha neih an chhawr tangkai theih loh reng hnuin United tan hian defender Lisandro Martínez chuan minute 78-naah mawi tak, vanneihthlak fu siin a pet goal a, hmahruaina goal a thun. Martinez pet hi tha filawr ni lem lo mah se si nghak Bernd Leno awmhmun a fuh tawk lova, Leno hian uiawm takin a chhuah a. He goal hi an hnuaia awm Manchester United lakah an tlawm phah ta hial a ni.
Fulham lakah an chak vangin United hian table-ah hma an sawn hret a, 14-na atangin 12-naah an inhlangkai. Manager thar Ruben Amorim hnuaiah beisei angin hma sawn chak lo mah se United hi an insiamtha hret hret a. Table laihawl chung lam luah thei turin hma lam an pan ve zel. Red Devils hian European competition khelh phak tumin tan an khawh zui hle ngei ang.
Mimualah Manchester United in hnehna an chan laiin Tottenham erawh chu an mikhual Leicester City lakah an tlawm ve thung a, Spurs hi an talbuai thui deuh deuh zel a, 15-naah an awm der tawh.
Tottenham hian an mikhual Leicester City lakah goal an thun hmasa a, minute 33-naa Richarlison goal thun hmangin si khat faia hmahruai chungin chawlhlawk an hmang.
Table hnuai lama awm mek Leicester City lakah chak tum viau mah se Spurs hian chawlhlawk hnu lamah goal an chhuah ta thuai thung. Second half tan atanga minute khat hnu lekah Foxes legend Jamie Vardy chuan goal thunin an si phurh a sut. An si phurh an sut hnuin Foxes an khel tha chhunzawm viau a, goal pawh an thun belh leh thuai. Vardy goal thun atanga minute li hnu lekah Bilal El Khannouss chuan hma an hruai letna goal a thun zui leh zat. Minute 50-naa an goal thun hi hun tawp thlengin an vawnghim a, team lian Tottenham lakah hnehna changin point thum hlu tak an hmu.
An mikhual Leicester City lakah an tlawm leh tak vangin Tottenham manager Ange Postecoglou dinhmun a derthawng leh zual. Spurs hi season kal mekah vawi li chauh an chak lain vawi 14 ngawt tlawm zawkah an tang tawh thung.
An chunga awm Fulham lakah United an chak
Get real time updates directly on you device, subscribe now.
Next Post