An dai chin apiang ngamtu Real Madrid

Champions League group stage match hnih an khelh tawha chak ve ve Real Madrid chuan Thawhlehni zan Group C match pakhat zawkah 2-1-in mualneitu Sporting Braga an hneh leh a, khelh thuma la chak vek chungin an group table-a an hmahruaina an sawh-nghet deuh deuh.
Portugal ramah pawh England midfielder Jude Bellingham chuan a club thar tana chetthat a thulh duh lo tluang zel a, second half tir lam minute 61-ah Vinicius Junior siamsak atangin mikhual goal hnihna khungin, first half minute 16-a Rodrygo goal nen Bernabeu club hian sihnih faiin hma an hruai.
Braga kirleh beiseina siamsak turin Bellingham-a goal an thah atanga minute thumnaah Alvaro Djalo chuan mualneitu team siphurh pakhat zawk a sut then a, mahse, goal dang an thunbelh zawh loh avangin Braga Municipal Stadium-ah Carlo Ancelotti team chuan point thum an hmu zui ta tho a, khelh thuma point kua hmuin an group hma an hruai nghet.
Kum 20 mi Bellingham hian Real tana Champions League game thum a khelh tawhah goal khung kim vekin, tualchhung league lamah pawh an star forward thinte kalbo zawh hnua an innghahna lian a ni mek bawk.
Thawhlehni zan thleng khan inelna hrang hrangah belhkhawma match 15 a khelh tawh atangin midfielder Bellingham hian club leh ram tan goal 12 a khung tling tawh.
Birmingham City midfielder hlui Bellingham hian kumin nipui insuan hun lai khan Los Blancos hi Boru-ssia Dortmund atangin a zawm kha a ni a, Santiago Bernabeu a thlen tirh pat atangin Spanish La Liga club tan an goal bawh tichaktu a ni nghal a, a club thar tana a season khatnaah hian La Liga lamah pawh khelh 12 atangin goal 11 tehreng a khawl tling tawh.
Game-ah kirleh ta ila, hun tawp dawnah Vinicius Junior chuan mikhual goal thumna tur thun bawk mah se offside vangin hnawlsak a ni a; first half-a Rodrygo goal an pawm loh nen Real Madrid hian goal hrim hrim chu vawili an tilut tling.
Real hi record siama Cham-pions League trophy tum 14 la tling thei awmchhun an ni.
Inkhelh ban rualin team pahnih player-te an buai zui laih a, Real Madrid defender Antonio Rudiger chu khelmualah a team-mate thenkhatin Braga player-te velh tumna atangin an veng laih laih!
Thawhlehni zan Group C inkhel dangah pahnihna luahtu Napoli chuan chak ni hmel la hmu ve lo Union Berlin mualah 1-0 hnehna an sualchhuak a, khelh thumah point ruk humin, point thum ni ve tawh Braga chuan pathumna an luah a, a mawngphahah Berlin an inchar nghet deuh deuh.