An intiam anga an tih loh chuan lo chhuahchhal r’u – Dr Lalmalsawma

An intiam anga an tih loh
chuan lo chhuahchhal r’u
– Dr Lalmalsawma
Sawrkar chu an thutiamah an ding em, tih lo en a, an intiam anga an ti lo a nih chuan an rawn kal hunah lo chhuahchhal turin a chah tih Congress treasurer Dr Lalmalsawma Nghaka chuan a sawi.
Sinlung Hills Council inthlan tura campaign-a chhuak MPCC treasurer chuan, NLUP a hlawhtling lo, tia tlangauten Sakawrdai leh a chhehvela kuthnathawkte tlawh se, an dinhmun zirchiang rawh se, tia sawiin, hmunphiah chin thlangte khan awlsam taka an hralh thin laiin, ZPM sawrkar a rawn piang a, rate sang zawk tiamin beiseina sang tak an siamsak a. Chu an beiseina thar neih chu an beidawnna thlentu mai a ni zawk tih Tinghmun khua leh a chhehvel amiten an chiang hle tih a sawi. “Kumdanga hmunphiah an hralh thin chanve pawh tling loa an hralh a ngaih phah,” a ti.
Sawrkar chu a thutiamah a ding em, tih lo en tura chahin, “An intiam anga an ti lo a nih chuan, an rawn kal hunah lo chhuahchhal ang che u. MNF an rawn campaign hunah in intiamna cheng nuai 3 kha khawiah nge, tiin lo zawt ula; ZPM an rawn campaign hunah, min hmangaih tak tak a nih chuan kan phurrit chhawk zangkhai turin ration buhfai leh tuialhthei man min tih hniam sak leh rawh u. Kan hmunphiahte Rs. 100 chuan min lei sak rawh u, lo ti ang che u,” a ti.
SHC inthlan turah hian thusawia ding nghet thin Congress tan kawl a eng tih Dr Lalmalsawma hian a sawi a. Kalphung thar mak tak kan hrawn mek a, mipuiin Congress bawk an enthla leh tawh, tiin a sawi. “Tuna ZPM-a lutte hi bazar an ni a, Congress-a rawn lutte hi mi tak tak an ni zel. ZPM kaltlang hian hmasawnna tak tak a awm dawn lo tih hriate Congress-ah an rawn lut zel a ni,” a ti.