An kawtkaia chak Bayern Munich

Inkhel en taima German fans 75,000 zetin Thawhlehni zan khan Champions League game-a Bayern Munich leh Sporting CP inhmachhawn thlir turin Allianz Arena an lut a; Joshua Kimmich ‘own goal’ avanga mualneitu team lamin si an phurh hmasak zet hnuah goal thuma chhangletin 3-1 hnehna nen knockout stage luh an hnaih zel.
  Tarlan tak angin, second half minute 53-ah mikhual counter attack hmuh tur awmin, Bayern midfielder Kimmich chu Spanish defender Ivan Fresneda cross thenfai a tumna lamah a chesual a, an lam goal-ah a tilut palh.
  Minute 10 an khel tling leh dawn chiah tihah ven loh Serge Gnabry chuan Michael Olise siamsak atangin mualneitu team siphurh a sut a; a hnu lawkah Lennart Karl chuan Konrad Laimer-a ball pek hmangin home team hmahruailetna goal a thawh zui ve leh.
  German rawlthar kum 17 mi Karl hian Bayern Munich tan a zawnin Champions League game thum chhung goal a thun tling ta a, he competition-a chuti ang ti thei naupang ber ni nghalin, season kal lai inelna hrang hrangah a club vawn lai tan goal nga a khung tling ta bawk.
  Vincent Kompany team-in duhtawk an la ngah mai lo a, minute 77-ah German centre-back Jonathan Tah chuan chiang zawka Bayern chakna goal a thawh zui ve leh ta a ni.
Table ler luah inchuhna kal mekah Bayern hian po int-ah Arsenal an nihrualpui ta a ni.
Thawhlehni zan inkhel dangah Atletico Madrid chuan 3-2-in mualneitu PSV Eindhoven an hneh a; season kal laia Champions League game ruk an khelh tawhah La Liga club hi vawi li an chak tling ta a ni.