An kawtkaia chak nuamsa Real
Champions League title an kawl lai humhim tura ke an pen mekna kawnga harsatna tawk chho ta tlat Real Madrid chuan Nilaini zan league phase match pakhatah 5-1 tehrengin Estadio Santiago Bernabeu mikhual Red Bull Salzburg an sawp a, automatic qualification chan theihna hmun top eight chu point khata la thleng zo loin point 12 nen table-ah 16-na an luah a, two-legged khel pha tur erawh chuan dinhmun thaah an ding ta.
Kumin Champions League game an khelh hmasa vawiruka vawithum zet tlawm tling Madrid hian chak an mamawhna inkhelah an Austrian mikhualte an dim lo hle mai a; first half leh second half-a Brazilian pahnih Rodrygo leh Vinicius Junior-te goal hnih ve ve thun inkarah harhtharna chang mek Kylian Mbappe chuan goal khat a thawh ve leh bawk.
Salzburg goal neihchhun kha hun tawp hma minute nga chauh awm tawha Mads Bidstrup-a tihluh niin, Bernabeu-a an tlawm leh hnuah league phase game sarih khelin vawiruk an chak lo tling a, khelh khat hmabak la nei bawk mah se point thum chauh an la hum avangin Champions League kal lai atangin an tla fel.
Fans 73,692 pungkhawm hmaah play-off tal beisei thei tura chak mamawh Austrian club-in khawng angreng takin bul tan mah se minute 23-ah Madrid lamin awmze neia an nawr hmasakber atangin goal an khung nghal a, he goal hmahruai hi Jude Bellingham-a’n Vinicius-a ball kang a dawnsawn hnua Rodrygo a siamsak atanga lut a ni.
Englishman bawk hian first half-a Brazilian star Rodrygo goal tur dang one-two tuihnai zet hmangin a chhawpsak leh bawk.
Second half tan hnu lawkah Mbappe chuan mikhual German keeper Janis Blaswich-a tihsual hlawkpuiin Real goal thumna a thawh.
Rei vak loah Vinicius chuan Luka Modric-a pass pui zet hmangin a goal hmasa zawk a thawkchhuak ve leh a; minute 77-ah goalkeeper Thibaut Courtois atanga ball chhuak in pass kualin a hrinchhuah atangin Brazilian Vinicius hian he match-a a goal hnihna leh Madrid goal ngana a khung zui leh a, Champions League game ruk atanga goal sarih thun thei Vinicius-a nihna kan hmuh belh zel.
Spanish giants a zawm hma pawha Europe club inelna sang bera hming lo chher tawh Mbappe kha Champions League goal 75 zeta inrawlh tling player pariatna chiah a ni.
Tun season nelna hrang hranga a team a tlawmpui zut avangin manager Carlo Ancelotti dinhmun a hahthlak hman hle a, Nilaini zan hnehna kha Italian coach tan hian hlu hle tura ngaih a ni.
Nilaini zan result
RB Leipzig 2-1 Sporting CP
Shakhtar Donetsk 2-0 Brest
AC Milan 1-0 Girona
Arsenal 3-0 Dinamo Zagreb
Celtic 1-0 Young Boys
Feyenoord 3-0 Bayern Munich
PSG 4-2 Manchester City
Real Madrid 5-1 Red Bull Salzburg
Sparta Prague 0-1 Inter Milan