An kawtkaia chak zo lo Juve

Turin khaw khelmual langsar Allianz Stadium-ah Juventus-in an mikhuak Napoli lakah minute 90 chhungin goal an khung zo lo tluanchhuak thak a, goal awm loa inhnehtawkin team pahnihin point khat ve ve an hlawhchhuak.
Team pahnih hian chak se Serie A table-a hmahruai theihna hun remchang an nei ve ve a, mahse, ‘goalless draw’ avangin katliamta Zirtawpni zan inkhela 3-2-a Hellas Verona hnehtu Torino bawkin hma an hruai chhunzawm leh ta a ni.
Kum 22 chhung tehreng Old Trafford-a a khawsak hnua kumin August thlaa Manchester United chhuahsana Naples khaw team zawm ta Scotland midfielder Scott McTominay chuan a tir lamah mikhual team tana hmahruaina goal khung theihna hun remchang tha tak a bawhpelh a, box tlang hriam lai atanga a shot chhe lo tak chu Juve keeper Michele di Gregorio chuan a dansak.
Juventus goalkeeper ba hian half-time dawnah Matteo Politano free-kick chhuih chu hmuni mah a sawnsak thei leh hlauh bawk.
Second half tir lamah pawh Politano bawk hian Antonio Conte team hmahruaina goal khung thei turin hun remchang dang a hmu leh a, mahse, tah pawh hian pen 18 vela hla atangin goal kham chungah a thlawhchhuak arh hluai bawk!
Teun Koopmeiners pawhin rem veng vawng atangin Juve goal tur zawnna ball a thlawklut kual er ngawk a, goal-ah a chang zo ta bik chuang lo.
Point 10 hmuin Napoli-in Serie A table-ah pathumna an luah chho a, Torino nen point khatin an inthlau.
A zawna league draw vawithum tehreng nei tling ta Juve chu palinaah awmin, Napoli hi point khat bawkin an pha lo chhunzawm ve bawk.
Nizan inkhel result tarlan hman loh pakhatah San Siro-a Milan derby kan thlirliam a, league season kal laia Inter Milan leh AC Milan insut hmasakna hi karliamta tawpa Italy ram titi lian a ni leh.