An kawtkaiah Real chak hram

An kawtkaiah Real chak hram
Pathianni zan Spanish La Liga inkhel pakhatah Real Madrid chuan goal hnih chhuah zawn hmasa zawk zet chungin Santiago Bernabeu mikhual Almeria lakah 3-2 hnehna an changlet thei hram a, table-ah an aia game khata khel tam zawk Girona FC chu point khata la pha lo chungin pahnihna an luah chhunzawm.
Point ruk chiah hum chunga table mawngphah luah nghet tulh tulh Almeria tan Largie Ramazani chuan tan atanga minute khat pawh a liam hmain hma-hruaina goal a thun a, Bernabeu mipui a barakhaih chiang kher mai!
Spanish giants hian first half-ah an siphurh an sut zo lo mai ni loin chawlh-lawk hnaih tawh minute 43-ah Edgar Gonzalez chuan sihnih faia mikhual hmahruaina a khung belh a, half time-ah Almeria chuan 2-0-in hma an hruai!
Second half-a Carlo Ancelotti team chhanchhuaktu pawh Spain leilung a thlen hnua chetha chho rei tawh tak England midfielder Jude Bellingham bawk ni lehin, minute 57-ah English mihang player hian Madrid siphurh pakhat zawk sut thenin, minute 67-ah Vinicius Junior chuan 2-2 a nihna goal thawh ve lehin, hun pekbelh minute kuana a liam hma chiahin Dani Carvajal chuan chakna goal a tilut ta hlauh a, he goal pawh hi Bellingham-a chhawpsak leh bawk a ni.
He hnehna avang hian Real chuan table-ah hma an hruai hman zawk a, mahse, a hnu lawka khelmual lut Girona FC chuan 5-1 tehrenga team talbuai laklawh dang Sevilla an sawp zui ve leh tak avangin Los Blancos hi pahnihnaah bawk an chhukthla leh ta rih a ni.
Girona tan hian Ukraine striker Artem Dovbyk chuan hat-trick a siam a, La Liga joint-top scorer Belling-ham nihrualpuiin league goal 14 a thun tling ve ta chiah a ni.
Inkhelh banah Almeria midfielder Gonzalo Melero a lawm lo hle a, an tana tha lo lam thutlukna siam sektua a puh Video Assistant Referee (VAR) vangin kha game-ah khan rawk an tawk ti hialin a sawichhuak a, an chak loh dan chu na a tih thu leh VAR thutlukna chhia kha an vawikhat tawrhna a nih loh thu leh an chunga thil thleng kha awihawm loh hial zawk niin a sawi a, kha game-a hnehna chang tur khan an khelh dan bak an tan tih leh tur dang a awm loh thu a sawilang tel hial.
Goalscorer Gonzalez chuan, He competition hi mi zawng zawng tan a fair tawk tur a ni a, a chang hi chuan hmuh hrehawm tak tak a awm thin si,” a ti.
Real Madrid penalty hlawhchhuah dan khan sawisep a kai ve lah tak bawk a, VAR thutluknaah penalty ham a ni a, Bellingham chuan a vawikhatna atan La Liga spot-kick a chhuih a, Almeria goalkeeper Luis Maximiano tluklohna lamah a chhuihlut.
Almeria lam hian sawisel tur dang nei bawkin, an goal thumna hlawhchhuak ngeiah an inngai a, mahse, Ramazani cross atanga Kepa pela Sergio Arribas-a ball thawnluh chu VAR-in a hnawlsak leh bawk.
Vinicius-a’n mualneitu team siphurh a sut dan pawh kha Almeria lamin na takin an sawisel a, goal a thun hmain Brazilian khan a banin ball a thunun niin a lang a, handball avangin goal loa ham a ni zet a, VAR hmanga endik a nih hnuah mikhual team tan lo zawng bawkin thutlukna siam a ni leh!
Hei mai hi a la ni lo cheu a, referee Francisco Maeso chuan Almeria tana Sergio Arribas-a goal pawh rei tawk fang VAR-in a endik hnuin a hnawlsak bawk a, kha goal tur intin-tuah chhoh laia Almeria midfielder Dion Lopy-a’n Bellingham-a hmai a tawkfuh chu goal loh chhana puan a ni!
Almeria boss Gaizka Garitano lawm lo lutuk a tawng na deuh a, yellow card vawihnih hmuh vangin technical area atanga hnawhdo niin, minute 11 zet hun pekbelha minute kuana a kal mek laiin Real chakna goal a han lut zui bawk nen Almeria player-in an tan khati baka chak tura khelh ngaihna a awm loh thu a sawi pawh kha a hriatthiam theih fu awm e!
Real boss Carlo Ancelotti ngei pawhin Almeria lam thinrimn aa hriatthiampui thu inkhelh banah sawiin, thutlukna an hmuhho erawh tha tawka a ngaih thu a sawi a, game mak tak a nih ve reng reng thu leh an tan first half chhe tak a nih thu sawichhuak chungin a hma ni chiaha an training session atangin an fuh lo chho tawh a, Arab rama tournament khel zo hlimhlawt a naute an chau tih a tarlang tel.
Almeria khan season kal laia La Liga match 21 an khelh tawhah hnehna an la chang zo lo tluang chhunzawm zel.