An mualah England an chak zo lo

Inrinni zan khan football a ram thawm na tak England chuan Wembley Stadium a an mikhual Uruguay an hneh zo lova, 1-1 in an inhnehtawk. England result bakah internation friendly match a result langsar deuh deuh kan hrut kual ang.
Whyte a inchawkchhia
Football ram ropui a, tualchhung league lian leh harsa ber neitu England chuan an khelmuala ngaihhlut Wembley Stadium-ah World Cup a champion hmasa ber Uruguay an mikhual. World Cup a vawi hnih champion tawh Uruguay lakah hian hun rei tak hnua ram tana fehchhuak leh Ben White chuan hmahruaina goal a thun naa penalty a chawi vangin an chak zawh loh phah thung a, amah a inchawkchhe tawk chiah.
England tan hian goalkeeper Trafford leh Everton midfielder James Garner ten a vawi khat nan bul an tan a, a khel chhe lem lo hle nghe nghe. An forward pawimawh Harry Kane tel lova inlan an ni a, Chelsea player pawimawh Cole Palmer pawhin bul a tan lo bawk. Wembley stadium-ah team hnihte an inhnehtawk viau a, goal pawh a lut har hle. Hun rei tak chhung goal lut a awm theih loh hnuin bench atanga lut Ben White chuan minute 81 naah hmahruaina goal a thun. Hun tawp dawn hnaihah goal an thun vangin England hian chak theihna hun tha tak an nei hman.
Goal an chhuah hnuin Uruguay in an si phurh sut tumin tan an khawh a, hun tawp dawn hnaihah an vannei ta nge nge. Three Lions tana goal hmahruai thuntu Ben White chuan hun pek belhah penalty a chawi. He penalty hi Federico Valverde chuan minute 90’+4-naah a pet goal a, an si phurh a sut. Valverde goal thun hnuin goal dang a luh belh thei tawh lova, England leh an mikhual Uruguay te chu 1-1 in an inhnehtawk zui ta a ni.
Spain an chak awlsam
Zirtawp zana inkhel dangah European champion Spain chuan an mikhual Serbia chu 3-0 in an hneh a, an mualah awlsam takin hnehna an chang.
World Cup 2026-ah pawh champion tura rinkai ber zinga mi Spain hian Villareal muala an mikhual Serbia lakah bul an tan tha viau a, goal pawh an thun har lo. Inkhel tan atanga minute 16-na lekah Mikel Oyarzabal chuan hmahruaina goal a thun. Hma takah goal thun bawk mah se goal dang erawh an thun belh thei mai bik lo thung. Goal lut a awm belh loh reng hnuin goal hmahruai thuntu Oyarzabal chuan chawlhlawk dawn hnaih minute 43-naah an goal hnihna thunin an hmahruaina a tizau a, 2
Chawlhlawk hnu lamah Spain an khel tha chhunzawm a, goal khat dang an thun belh leh. Minute 72-naah Victor Munez an goal thumna thunin an hmahruaina a tizau leh zual. An goal thum thunte hi an venghim a, an mualah 3-0 in an chak zui ta a ni.
Norway an tlawm
World Cup khel tur zawnnaa khel tha a, chak tluang tak Norway chuan Netherlands lakah goal thun hmasa bawk mah se mikhual an nihna hmunah si an phur let a, tlawm zawkah an tang.
Johan Cruijff Arena-ah Norway in bul an tan tha a, minute 24-na lekah Andreas Schjel chuan hmahruaina goal a thun. Goal thun hmasa zawk a nih vangin inrintawkna sang zawk nen inlan bawk mah se Netherlands erlet an tuar lova, goal hnih an chhuah zawn.
Hmuhnawm taka football khel thin Netherlands tan hian Liverpool captain Virgil van Dijk chuan minute 35-naah goal thunin an si phur a sut. Chawlhlawk hmain hmahruai let thei bik lo mah se second half ah hmahruai letna goal an thun ta thuai thung. Minute 51-na lekah Tijjani Reijnders chuan an goal hnihna a thun a, hma an hruai let ta nge nge. Reijnders goal thun hnu hian goal dang a luh belh thei tawh lo a, Netherlands chuan an mikhual Norway chu 2-1 in an lehthal a, an mualah hnehna an chang zui ta a ni.
Germany an chak hram
Football ram ropui, World Cup-a vawi li champion tawh Germany hian Mimualah Switzerland an hmachhawn a, hma takah goal chhuah bawk mahse Florian Wirtz goal hnih thun hmangin hnehna an chang let.
Switzerland tan hian Dan Ndoye chuan minute 17 na lekah hmahruaina goal a thun a, Football thiam ram Germany lakah hma an hruai. Goal chhuah mah se Germany an buai lova, na taka an khingpuite nawr letin defender Jonathan Tah chuan minute 26-naah goal thunin an si phurh a sut. 1-1 a nih hnuin inkhel a hmuhnawm zu viau a, mualneitu Switzerland tan Breel Embolo chuan minute 41-naah hma an hruai nawn lehna goal a thun. Hnufual nawn leh mah se Germany an thochhuak leh thuai a, Serge Gnabry chuan minute 45+2-ah goal thunin an si phurh a sut a, 2-2 a inhnehtawk chungin chawlhlawk an hmang.
Chawlhlawk hnu lamah Germany in goal an thun hmasa ve thung a, Liverpool tan vul chho mek Florian Wirtz chuan minute 61-naah hma an hruai letna goal a thun. Hma hruai let mah se hma an hruai rei thei bik lo thung a, minute Joel Monteiro chuan goal thunin an si phurh a sut. 3-3 in inhnehtawk leh bawk mah se hun tawp dawn hnaih minute 85-naah Florian Wirtz chuan hma an hruai nawn lehna goal a thun a, he goal hi mualneitu Switzerland lakah an chakpui ta nge nge a ni.