An mualah United an mualpho

Pathianni zan khan English Premier League 2-24-25 khelh chhunzawm a ni a, inkhel ngaihven hlawh takah Manchester United chuan an mualah ngei an mualpho. An mikhual Tottenham Hotspurs lakah 3-0 ngawta an tlawm vangin United manager Erik ten Hag-a hma lam hun turah zawhna a tam hle. Pathianni zana inkhel dangah Aston Villa an chak zo lo bawk.
12 naah United
Season thara bul tan tha lo Manchester United hian Old Trafford-ah Tottenham Hotspurs an mikhual a, fiahna hautak an hmachhawn. An mualah London club lian Tottenham an mikhual tum hian Red Devils an khel chhe viau a, ball inpek dik loh an ngah a, ball an hloh nasa viau bawk. Tottenham lakah goal an chhuah hnuin captain Bruno Fernandes hnawhchhuah a ni zui leh bawk nen si thum gai ngawtin an tlawm zui ta a, 12-naah an awm a ngaih phah.
Old Trafford a lenglut Tottenham hian bul an tan tha tak zet a, Erik ten Hag-a enkawl United an ngam hle. Inkhel tan tirh lamah na takin United in an nawr nghal a, mah se an tisual. Marcus Rashford ball chhuhsaktu Micky van de Ven chuan pui zetin a khalh tlang. Hla tak atanga United box chhungah a khalh luh hnuin Van de Ven hian Brennan Johnson tan tha zetin a chhawpsak. Vengtu nei lo Johnson hian minute 3-na lekah awlsam zetin a pet goal a, hmahruaina goal a thun.
Hma takah goal an thun vangin Tottenham an phur a, inrintawkna sang tak nen Old Trafford-ah an inlan chhunzawm. Spurs hian na takin an khingpuite an nawr chhunzawm a, goal pawh an thun belh teuh hle. Fuh taka an khingpuite an nawr tlang hnuin goal hmahruai thuntu Johnson chuan goal thun theihna hun tha a nei zui leh. Johnson hian si nghak Andre Onana paltlang tawh mah se goal post a pet per a, uiawm takin a hun tha neih a hlah. Hemi hnu lawk hian centre-back Christian Romero chuan goal a thun belh teuh viau bawk. James Maddison chuan goal thun theihna hun tha tak a nei zui leh naa United laka goal thun thei lo Maddison hian a hun tha a hloh zui ve leh bawk.
United hian an si phurh sut tumin tan khawh nasa viau thin mah se ball a inpe sual nasa a, ball an hloh nasa viau bawk. Chawlhlawk dawn hnaihah Marcus Rashford ball vawrh luh tha tak atangin Alejandro Garnacho chuan goal a thun teuh hle a, a pet kawh mar tha tak chuan goal post a per a, Tottenham an him thei hlauh. Goal thun tuma tan an khawh laiin captain Bruno Fernandes a chesual a, hnawhchhuah a ni. Fernandes hian James Maddison ngalah a tlawh a, yellow card la hmu lo mah se hnawhchhuah a ni. Hnawhchhuah a nih danah hian sawi neuh neuh awm zui mah se a chet hlauhawm em vangin United captain Fernandes hi hnawhchhuah ngei tura niin a lang.
Si phur zawk an nih bakah tlem zawk an nih bawk vangin United dinhmun a chhe hle. Red Devils hian chawlhlawk hmain goal chhuah belh lo mah se, chawlhlawk hnu lamah goal an chhuah belh thuai thung. Second half tan atanga minute hnihna lekah Spurs hian fuh zetin an nawr tlang a. Goal hmahruai thuntu Johnson chuan Dejan Kulusevski tan tha zetin a chhawp a. Kulusevski hian awlsam taka pet goal in an goal hnihna a thun a, an hmahruaina a tizau.
Si hnih ngawta an hnufual hnuin United hian goal thun ngei tumin an an khawh a, manager Erik ten Hag chuan a player a thlak kual nasa hle. Tlem zawk ni mah se goal chhuah belh huamin an khingpuite an nawr a, an khel tha ta viau bawk. Goal thun theihna hun tha nei bawk mah se goal ah an chantir thei lo tluang zel. United an phur thar a, tawh an khirh chhoh viau laiin Tottenham in goal an thun leh nawlh a, United pawngpawrh tur an bengdai. Tottenham tan hian Domic Solanke chuan Pape Matar Sarr tauh pial tha tak chu hnaite atangin a tlawh goal a, an goal thumna thunin an chakna a nemnghet.
Solanke goal thun hian United thahrui a chhat a, an phurna sang tak an lo neih ve hman chu a vawm bosak. Hun tawp thlengin goal dang a luh belh t hei lo va, United chu an mualah ngei an mualpho a, an mikhual Tottenham lakah 3-0 ngawtin an tlawm zui ta a ni.
Tottenham lakah chiang taka an tlawm leh tak vangin United hian hma an sawn thei lova, 11-na atangin 12-naah an tlahniam. EPL a player hlawhtling ber United hian season tharah vawi ruk an khel tawh a, tlawm zawkah vawi thum ngawt tang tawhin point 7 chiah an la hmu. United an talbuai lai hian Ange Postecoglou enkawl Tottenham chuan khelh ruk atanga point 10 hmuin hma an sawn ve hret thung.
Ten Hag hma lam hun a chiang lo
Old Trafford a an mikhual Tottenham Hotspurs lakah an mualpho hnuin United in an manager Erik ten Hag an ban zui mai rinna lian tak a awm a, mah se an ban mai bik lo. United hian Europa League-ah FC Porto an hmachhawn zui dawn a. Kar tawpah Aston Villa an hmachhawn zui leh dawn bawk. Inkhel an hmachhawn zawn dawn vangin an manager Ten Hag hi an ban rih lo nia sawi a ni a, an manager thar tur an melh reng tho niin tarlan a ni bawk.
United hian an manager thar ni turin Juventus manager hlui Massimiliano Allegri an duh niin report a awm a. Ani bakah hian Inter Milan manager Simone Inzaghi hming sawi rik a ni a. England manager hlui Gareth Southgate hming sawi lan a ni bawk. Gareth Southgate hian United enkawl a chak viau a, sawmna dang a dawn pawh United a ngaihchan vangin a bengkhawn duh lo ngat a ni. Tunkar a ral ang a, kar tharah chuan United-a Erik ten Hag hma lam hun tur a chiang fiah felh tawh tura ngaih a ni.
Villa an chak zo lo
Pathianni zana inkhel dangah season thara khel tha Aston Villa chu kai thar Ipswich Town lakah an chak zo lova, 2-2 in an inhnehtawk.
Portman Road-a an mikhual Aston Villa lakah Ipswich Town in bul an tan tha viau a, inkhel tan atanga minute riatna lekah Liam Delap chuan hmahruaina goal a thun. Hma takah goal chhuah mah se Villa in tha zetin an khingpuite an chhanglet a, Morgan Rogers chuan minute 15-naah goal thunin an si phurh a sut a. Ollie Watkins chuan minute 32-naah hma an hruai letna goal a thun a, hun rei tak chhung he goal hmang hian hma an hruai. An mualah an hnufual reng hnuin Ipswich Town tan goal hmahruai thuntu Delap chuan an si phurh sutna goal a thun zui leh a, 2-2 in an inhnehtawk zui ta a ni.