An mualah West Ham an tlawm

Thawhleh zan khan English Premier League khelh chhunzawm a ni a, inkhel awmchhunah West Ham United chu an mikhual Nottingham Forrest hneh lovin an tlawm. An mualah an tlawm vangin Hammers hian relegation zone an luah nghet deuh deuh zel.
Table-ah 18-na luah mektu West Ham hian an chung chiaha awm Nottingham Forrest an mikhual a, an mualah bul an tan tha viau. Inkhel tan atanga minute 13-na lekah Forrest player Murillo chuan an lamah a ti-goal palh a, mualneitute hmahruaina goal a thunsak. He goal hmang hian Hammers in 1-0 a hmahruai chungin chawlhlawk an hmang.
Chawlhlawk hnu lamah Nottingham Forrest an khel tha ve thung a, goal hnih thunin West Ham an lehthal. Forrest tan hian Nicolás Domínguez chuan minute 55-naah goal thunin an si phurh a sut. 1-1 a nih hnuin inkhel a hmuhnawm zui viau a, goal thun tumin an innawr tawn nasa hle. Goal lut a awm belh theih loh reng hnuin hun tawp dawn hnaiah Forrest an che fuh a, penalty an hmu. He penalty hi Morgan Gibbs-White chuan minute 89-naah a pet goal a, hma an hruai letna goal a thun. Gibbs-White goal thun hmangin Forrest hian hnehna hlu tak an chang a, point thum an hmuh belh.
An mualah an tlawm vangin West Ham dinhmun a chhe zual zel. Hammers hian khelh 21 atangin 14 an hmu a, tlahniam thei dinhmunah ding chhunzawm zelin an chung chiaha awm Nottingham Forrest nen an inkarah point 7 a tla zep mek. West Ham dinhmun a chhiat belh laiin Nottingham Forrest erawh chuan himna tlam tluang zawhin, hma lam an pan ve hret hret thung.
Nottingham Forrest hi season liam ta khan championship atanga kaisang tir an ni naa beisei phak bakin an khel tha. Top 4 huangte an luah thuak thuak hnuin European competition khel phakin season an khar thei hial. Season liam taah chetha viau mah se season tharah erawh beisei an phak ta lo viau thung. Hei hi nipui bazar laia an player tha thenkhat an chhuah vang nia ngaih a ni. London club West Ham pawh hi team vangtlang tan an ni reng thin a. 2025-26 ah erawh beisei an phak lo viau thung.