An sawisel thin ang chiah khan sawisel an hlawh ta – TJ Lalnuntluanga

An sawisel thin ang chiah
khan sawisel an hlawh ta
– TJ Lalnuntluanga
ZPM chu hnathawh thiam ber leh hre ber anga insawiin midang sawisel rengin an awm a, an sawisel thin ang chiah khan an sawrkarna hnuaiah sawisel an hlawh ve ta tih MNF minister hlui TJ Lalnuntluanga chuan a sawi.
Zirtawpnia MNF office-a inkhawmah MNF general secretary TJ Lalnuntluanga hian, Congress ni lo, MNF ni lo thla 10 lek sawrkarah party ngaihsak ve lo leh neutral mipui an beidawng nasa tawh nia sawiin, “Sawrkar thar hi hnathawh thiam ber leh hre ber angin an insawi a, midang sawisel rengin an awm a, an sawisel thin ang chiah khan sawisel an hlawh ve ta a ni,” a ti.
Kalphung nghet anga neih MLA term hnih (kum 10) chhung tih chu a inthlak tawh nia sawi bawkin, MNF chu Pathian zarah an tho chhuak leh thuai dawn tih a sawi. “Kan sawrkar leh chuan kan Kristianna champion puiin thalaite eizawnna lam nasa takin kan ngaihtuah ang. Kan sawrkar lai khan Covid vangin kum hnih leh a chanve hna thawk hleithei loin kan awm a, khati chung khan thil tam tak kan ti tho a, hma kan lak mek tam tak a hlawhtling hman ta lo a ni,” a ti.
Mizorama assets pawimawh zawng zawng chu MNF kutchhuak deuh vek a ni tih TJ Lalnuntluanga hian a sawi a. Aizawl leh district khawpui zawng zawnga development tam ber chu MNF ministry kutchhuak niin, Aizawl khawpui hmel lo danglam ta viaute, thingtlang khaw chengker ber thlenga inkalpawhna kawng chu kum 40 chhunga ram hruaitute kha awm mai mai loin, hna an lo thawk tih mipuiin an hriat a tul tih a sawi a ni.