An website enkawl tha lo department an awm nual – ICT minister

Sawrkar department zingah an website enkawl tha lo leh information pawimawh dah mumal lo an awm nual tih Information & Communication Technology minister Dr Vanlalthlana chuan a sawi.
Sawrkar department-ten online service leh mobile application hman tangkai kawnga an hriat tur inhrilhna, ‘Awareness and Sensitization Workshop on User Experience & Design System’ chu Mizoram Information & Communication Technology department leh sawrkar laipui hnuaia National e-Governance Division (NeGD) buatsaihin Aizawlah Ningani khan neih a ni.
Hmanpuitu ICT minister Dr Vanlalthlana chuan tunlai khawvelah mipuiin awlsam taka website leh apps hman theih an mamawh tih sawiin, hemi atana user interface/ user experience pawimawh dan a sawi a. Technology-in min khalh kal nasat tawh avangin, tuna website kan neih laite pawh mipui tan a tangkai thei ang ber turin enkawl zui a tul tih a sawi a ni.
Information mamawh en nan sawrkar website hrang hrang a tlawh kual nasat thin thu sawiin, sawrkar website update lo, information pawimawh pawh dah mumal lo leh enkawl tha tawk lo an awm nual tih sawiin, “Kan website leh apps hi mipui hman tangkai tur a nih avangin tan kan lak a ngai,” a ti.
Mizoram sawrkar hnuaia department hrang hrang leh a hmang tangkai thei tur Mizorama sawrkar laipui office-ten workshop chhimtu tur aiawh an tir a ni. NeGD mithiamten an zirtir a, zawhna an chhang bawk.