Anfield ah United

Pathianni zana English Premier League inkhel ngaihven hlawh berah Manchester United chuan an hmelma lian Liverpool chu Anfield-ah ngei an hneh. January 2016 hnu lamah a vawi khat nan Anfield-a an chak leh ta nawlh hi United tan champion tluka lawmawm a ni. United in Liverpool an hneh lai hian Aston Villa pawhin mualneitu Tottenham Hotspurs lehthalin hnehna an chang ve bawk.
United chakpuitu Harry Maguire
Champion lai Liverpool hi tunhnaiah an khel tha lova, EPL leh Champions League-a an match hnuhnung pathumah an tlawm zawn. Chelsea laka an tlawm hnuin Reds manager Arne Slot chuan, “Lungngaihna tur a awm love, kan khelh leh tur United hi awlsam zetin kan hneh dawn,” tiin a sawi a, Anfield-a an ngam thin tak United hi an hneh a ring hle. United hneh turin inringtawk viau mah se an khel chhe tluang a, an mualah ngei an hmelma lian ber United hneh lovin an tlawm khut. Reds hi avawi li ngawt an tlawm zawn taa insiamthat thuai an mamawh.
Rinkai lo zawk ni chunga Anfield-a lenglut Manchester United hian beisei phak bakin bul an tan tha a, goal an thun hma hle. Inkhel tan atanga minute hnihna lekah Bryan Mbeumo chuan hmahruaina goal a thun nghal. Mbeumo-a’n Anfield-a goal a thun hmasak ber hmang hian hun rei tak chhungin United in hma an hruai a, an chakpui teuh hle nghe nghe.
Tlarhma player nei tha tak Liverpool in an si phurh sut ngei tumin an khingpui United an nawr a, an hlauhawm thei hle. Khel tha tak Gody Gakpo chuan goal a thun teuh hle a, fuh zetin si nghak Senne Lamments pet kan mah se goal post a pet per hlauh a, vanneihthlak takin United an him hram. Gakpo hian chawlhlawk hmain goal a thun teuh viau bawk a, a cross tha tak chuan post a per leh tlat thung. United pawhin chawlhlawk hmain goal an thun belh teuh viau a, captain Bruno Fernades chuan hnaite atanga goal thun theihna remchang a neih chu uiawm takin a hlah ve tlat thung a. Chawlhlawk hmain goal lut a awm belh thei lo.
Chawlhlawk hnu lamah inkhel a hmuhnawm chhunzawm viau a, goal hnih luh belhin mit a tlai leh zual. Liverpool in an si phurh sut ngei tumin tan an khawh nasa hle a, an hlauhawm thei hle. Khel tha tak chunga vanduai tlat Gakpo chuan tha zetin shot bawk mah se a vawi thum nan goal post a pet per leh a, a vanduai a kal tluang zel. Goal post a tihper tlut tlut hnuin Gody Gakpo tann hun tha a inherchhuak nawn leh a, minute 78-naah goal thunin an si phurh a sut ta nge nge.
An si phurh an sut vangin Reds an phur a, an mualah hnehna chang turin an inringtawk thar viau bawk. Reds hi phur viau mah se an phur rei lo. Harry Maguire chuan minute 74-naah fuh zetin a tauh goal a, hma an hruai nawn lehna goal a thun. Liverpool in tlawm pumpelh tum viau mah se hun pangngai leh hun pek belh tawp thlengin an si phurh an sut thei tawh lova, Harry Maguire goal thun hmangin Manchester United in an Anfield-ah ngei hnehna an chang a, point thum hlu tak an hmu.
Manchester United hian an hmelma lian ber Liverpool mual Anfield-ah hnehna an chang khat hle. Anfield-ah hian Janury 2016 hnu lamah hnehna an chang thei ta lo ngar ngar a, an elpui liante hian an lo sawp hrep chang pawh a awm thin. Hun rei tak chhung Anfield-ah mangchhia an mang thin hnuin hnehna an chang ve leh ta nawlh a, Liverpool laka chakpuitu chu nuihzat hlawh thin Harry Maguire a ni. Maguire hian deu leh nuihzat hlawh viau thin mah se a tloin a rinawm tlat thung a, United mamawh chhanna a ni nawn leh thin.
Manchester United tan Liverpool hneh hi champion tluk dawna lawmawm a ni sa a, United manager Reuben Amorim tan a lawmawm leh zual ang. Amorim hian an mual leh mimualah United hi hnehna a la chan zawnpui ngai miah lova, Pathianni zanah Anfield-a an chak chiah khan a vawi khat nan United hi an mual leh Mimualah an chak zawnpui ta chiah.
United laka tlawm Liverpool khan nipui bazar inhawn laiin an squad thuam chak nan sum an seng hnem hle. British player manto ber ni tura an lak luh Alexander Isak chuan a man phuin a la khel chhuak thei lo zel a, beisei angin Florian Wirtz a la vul thei lo bawk. Team lian Liverpool tan vawi li ngawt tlawm zawn hi a mak zawk hial a, insiamthat thuai an mamawh hle. Reds hian nilai zan hian Champions League-ah Eintracht Frankfurt an hmachhawn zui leh nghal dawn a, hma lam pan thei turin chak an mamawh ang.
Villa pawh an chak
Pathianni zana inkhel hmasa zawkah Tottenham muala lenglut Aston Villa in si an phurh hmasak zet hnuin hnehna an chang let a, point thum hlu tak an hmu.
Tottenham Hotspurs in an mikhual Aston Villa lakah bul an tan tha viau a, goal pawh an thun hma hle. Inkhel tan atanga minute 5-na lekah Rodrigo Bentancur chuan hmahruaina goal a thun nghal. An mualah hma taka goal an thun vangin an phur a, point thum hmu turin Spurs an inringtawk hle.
Goal chhuah hma viau mah se Villa an buai lo a, huaisen takin an khingpuite an nawr let. Villa tan hian Morgan Rogers chuan minute 37-naah goal thunin an si phurh a sut. Goal a luh belh theih loh reng hnuin Emiliano Buendía chuan minute 77-naah Aston Villa hmahruai letna goal a thun. Buendi goal thun hmangin Villa hian 2-1 in hnehna an chang a, team lian Tottenham lakah point thum hlu tak an hmu.