Angelina Jolie leh Brad Pitt te fanu Shiloh Joile-Pitt chuan a hming thlak tumin danin hming thlak tura tul a tih ang te a buaipui zel a, court-ah hming thlak dilna a theh luh hnuah tunah chuan he tleirawl kum 18 mi hian chanchinbu lamah a hming a thlak thu hi ad a chhuah tir ta.
Shiloh hian Los Angeles Times chanchinbu-ah a hming thlak thu hi chhuahin, Shiloh Nouvel Jolie-Pitt tih thin chu Shiloh Nouvel Jolie tih tawh tur a nih thu a chhuah. Hetiang hi keini ramah pawh hming thlak tur ten chanchinbuah an hming an thlak thu an chhuah tir thin ang tho hi a ni hmel e.
California-ah pawh hian hming thlak tur reng rengin an khaw chanchinbu-ah hming thlak thu hi an chhuah ngei ngei a ngai a, an nu leh pa te hriatpuina leh remtihna ni lo, anmahni thua hming thlak tur chuan kum 18 an tlin phawt a ngai a, Shiloh pawh hian a kum 18 tlin champha, May ni 27, 2024 khan court-ah hming thlak dilna hi a theh lut a ni.
Shiloh hi Angelina Jolie leh Brad Pitt fate zingah a upat lama palina niin, Maddox, kum 22, Pax, kum 20, Zahara, kum 19 leh phir, Vivienne leh Knox, kum 15 te nen unau an ni a, a upa lam pathum hi Jolie leh Pitt ten an adopt niin, Shiloh leh Vivienne leh Knox te hi anmahni hrin an ni ve thung.
An unau zingah Zahara pawhin nikum November thla khan Spelman College sorority initiation ceremony-a a inhmelhriattirnaah a hming tawp atangin Pitt tih a lo hmaih ve tawh bawk a, hmanni lawkah Vivienne pawhin Broadway musical ‘The Outsiders’ tiha a channaah a hming tawpah Pitt tih a dah tel tawh lo bawk.
Angelina Jolie leh Brad Pitt te fanu Shiloh-i’n a hming atanga Pitt a paih thu chanchinbu-ah a chhuah tir
Get real time updates directly on you device, subscribe now.