Anthurium Festival leh Tourism

Anthurium Festival 2023 chu October ni 20-21 chhunga hman turin rel fel a lo ni leh ta.
Ministry of Tourism-in India rama tourism chawikanna atan phuahchawp Kût siam tura state tinte thurawn a pek angin, Mizoram pawhin chutiang atan chuan Anthurium Festival hi a siam a, kum 2006 atanga hman tan niin kumin hi Anthurium Festival vawi 18-na a lo ni ve ta. Covid-19 hripui avangkhan kum 2020 leh 2021 kha Virtual-a hman niin 2022 atangin Reiek tourist resort-ah hman tan a ni leh ta a ni.
Khualzinte hiptu tura huaihawt mah ni se, hun rei tak chu Anthurium Festival hian khualzinte a hip lut lem lo a, central hna thawka Mizorama awm mek hnamdang thenkhat leh festival laia Aizawla khualzin lo awm remchang thenkhat, festival chhimtu an awm ve phauh phauh thin.
Tuna social media te a lo chak tak hnu hian, Mizoram rawn tlawhtu foreign leh domestic tourist an awm ve ta sep sep a. Heng khualzinte hian Aizawl khawpui traffic discipline hi hahipin an an fak a, social media platform hrang hrangah an thehdarh a. Mizoram dung leh vang an fanna video te pawh an theh darh chuai chuai a, hei hian rah tha tak chhuahin, Mizoram tlawh an intihhmuh chho mek niin a lang.
Hei hi a lawmawm rual rualin, a dawnthleng lam hian kan lo zir a ngai a, heng khualzinmite hian Mizorama an cham chhunga nuam taka an khawsakna tur kan lo chhawpchhuah thiam a pawimawh a. A bikin kan tourist resort neihchhun ang angte hi tun dinhmun aia nasa taka kan thuam that a pawimawh dawn hle a ni.
Tuna Anthurium Festival hman tur pawh hi, social media platform a tha tawh bawk a, khualzin a tam thei ang ber hip tura kan inphochhuah thiam te pawh a pawimawh khawp ang. Mipui lam pawhin mawhphurhna kan neih chu, khualzinmite laka hawihhawmna lo lantir a ni a, khualchhawn dan thlenga kan inzir sauh sauh hi a pawimawh a, chu chu tourism promote-na a ni nghal zel a ni.