Anti-profiteering measure….

September 22, 2025 atangin India ram pumah Goods & Services Tax rate tihdanglam (tih-hniam) a ni dawn a, hemi hnu lama GST rate tihhniamna bungrua (goods) leh tha (service) man tihniam lo report lut a awm chuan, anti profiteering measure hmanga action lak zel a ni ang, tiin Commissioner of State Tax, HK Lalhawngliana chuan tun hnai khan a sawi a. “GST hniamna tur bungrua leh tha zawrh lama sumdawngten a zawrhna man an tihniam ngei tur a ni a; hemi kawngah hian, sawrkar chu a thikthu a chhe hle dawn,” tiin a sawi a ni.
GST rate tihhniam dan tur hi GST Council-in a puanzar hnuah item list te pawh chanchin thar lamah tarlan a ni tawh a. GST rate tihhniam a nih ang ngeia dawrtu (customer) te hnena sumdawngten an bungrua an hralh lo a nih chuan ‘thikthu a chhe hle dawn’ tih hi Mizoram dinhmun atana tuna kan tinzawn tur pawimawh tak a ni awm e.
Thil thar eng emaw kalpui (introduced) a nih hian, a hlimchhawnah thuneituten dan tlawhchhanin khal tak tak thu an sawi thin. Tunhma deuha sawrkarin taxi fare thar a siam khan, ‘taxi khalhtuten an service laiin taxi fare book hi an kawl ngei tur a ni’ tih kha thuneitute sawi dan a ni. Dan bawhchhetute hrem dan tur pawh an sawi bawk.
Hun a lo kal deuh a, passenger-ten taxi fare book an han dil chang pawha taxi fare book lek chhuak va va thei taxi driver hi an awm ta lo a tih theih awm e. Taxi fare bu anga kal chu sawi loh, taxi driver tam zawkte hi chuan anmahniin fare an intuk chawp a, chumi hmang chuan an service vel ta mai mai niin a lang. Mipui lam lahin complaint bik hek suh, thuneitute lahin hre reng chung leh hmu reng chungin an kalpel vel mai mai bawk a!
Tunah pawh hian kan han ti leh mah ang a, a tir lamah chuan ‘Section 171(1) of the CGST Act’ tih te, ‘anti-profiteering law’ tih te a ri zing leh ût ang. AMC-in a tir lama Aizawl khawpui ‘plastic free city’ an puan hlimchhawna khauh taka hma an la, a hnu lama a zuih ral leh ta mai ang kha kan ni ang tih a hlauhawm hle.
GST chungchangah hi chuan mipui (customer) lam pawimawhna a lian khawp ang. Mipui lamin complaint nachang kan hriat loh chuan, thuneitute tan pawh dan anga hma han lak chiam a harsa dawn a, thuneituten ‘action’ an lak theih nan mipui lam kan ‘active’ a ngai ve thung dawn a ni.