Apex Bank fakawm

‘Kohhran 74 ten biak in sakna tura Mizoram Cooperative Apex Bank atanga loan an dil tling khawm cheng nuai 2,370 chu Apex Bank-in pek a remti’ tih chu tun hnai chanchintharah hmuh tur a awm a.
Apex bank hian CDR tha tak a nei mek a, fak an phu. Tun dinhmunah Deposit cheng vaibelchhe 1,685 atangin loan cheng vbch 1,222 an pechhuak a. Mipui pawisa an dawn khawm (deposit) atanga an pek chhuah (credit) hi 72.5% lai a ni. Chumi awmzia chu, mipui sum dahkhawl hmun lia thena hmun thum deuh thuak chu mipui tan vek an theh chhuak leh a, pawisa tlingkhawm atanga 72.5% chu mipuiin an chhawr tangkai leh, tihna ni.
Hetih lai hian, Mizorama bu rawn khuar nationalised bank leh bank dang thenkhatte hi chu an CD Ratio a sang ngai lo. Chumi awmzia chu, mipui sum deposit chu mipui tan an thehchhuak tam lo, (loan an pe chhuak tam lo) tihna a ni. Bank CDR a hniam poh leh, kha Bank khan mipui tan sum (loan) a pe chhuak tlem a, sumdawn nan mipui sum an hmang nasa tihna a ni ber awm e. Thawkkhat lai khan, kan ram hruaitu lute pawhin Bank thenkhat phei chu an kamkhat deuh nghe nghe a nih kha.
Mizoram chhul chhuak Bank-te hi Mizoram tan chuan an hlu takzet a. Nationalised Bank-te hi ‘an tha lo’ emaw, ‘i dawr lovang u’ emaw tihna lam a ni lova, Bank tha tak tak vek an ni ang; mahse, Mizoram leilung faten Mizoram chhul chhuak ngei Bank dawr duhna thinlung kan pu thin leh mahni Bank ngei mai dawr nachang kan hre thin hi a tha; a chhan chu, mahni sum, mahni state chhungah, a vir vel theih vangin.
Mizorama bank dangte pawh hian tunhma aiin CD Ratio an nei tha chho ve ta deuh niin a hriat a. Bank CD Ratio a that hian loan hmangin mipuiin hmasawnna kan lo neih theih phah ve thin tihna a ni ber awm e.