Apex Bank-in kum zawnin ram pum huap lawmman la

Apex Bank-in kum zawnin
ram pum huap lawmman la
National Federation of State Cooperative Banks (NAFSCOB) chuan an kum 60 tlin, Diamond Jubilee chu New Delhi-ah an lawm mek a. Mizoram Cooperative Apex Bank Ltd. chuan tehfung hrang hrang hmanga endiknaah a zawna kum hnih (2022- 2023 & 2023- 2024) na atan India ram puma II-Tier Structure State Cooperative Bank zinga titha ber ‘Annual Performance Award For Best Performing State Cooperative Bank II-Tier Structure 2023-2024’ lawmman an dawn chu hlan an ni.
Union Cooperation minister Amit Shah hnen atangin Apex Bank chairman Lalnunsanga leh chief executive officer A Lallungmuana ten an dawng. Mizoram Cooperative Apex Bank chairman hi NAFSCOB Board of Director nilai mek a ni.
Apex Bank hotute chuan Best Performing State Cooperative Bank Award kum hnih chhung a zawna an dawng thei chu Mizoram mipui, sawrkar leh shareholder-te tawiawmna vang a ni, tiin, an chungah lawmthu an sawi a ni.
Apex Bank tarlan danin, Mizorama bank 23 awm mek zingah Mizo mipui tana luangchhuak nasa ber an ni a, credit deposit ratio 77% an nei mek.
NAFSCOB Diamond Jubilee lawm rual hian International Cooperative Alliance (ICA) Conference hman a ni bawk a. ICA president Ariel Guarco bakah Union minister pathum leh Ministry of Cooperation secretary ten an hmanpui a ni.