Apex Court-in CAA stay duh lo

Supreme Court chuan Citizenship Amendment Act (CAA chu stay duh lovin mahse court chuan sorkar chu April 18 thleng kar thum chhung CAA khinna petition 237 lai lut chu chhanna Lok Sabha inthlan hma ngeia siam turin a ti thung.
April 8 hmaa CAA hmanga India khua leh tui nihna pek an awm chuan special petition an siam a remti bawk a, hei hi senior lawyer Kapil Sibal leh Indira Jaising te chuan ngenna an siam vang a ni a. Sorkar aiawha ding Solicitor-general Tushar Mehta thung chuan, ‘Engmah statement ka siam dawn lo’a ti thung.
A hma erawhin Tushar Mehta chuan court chu petition chhang turin kar li hun pek a dil a.
“Affidavit detail taka kan file a ngai dawn a, petition 237 lai a awm si a. Interim application 20 filed tawh a ni a, a dang tam tak tihngai a la ni a. Kar li tal chu kan mamawh a ni” tiin court hnenah a sawi a.
He petition hi Chief Justice DY Chandrachud, Justice JB Pardiwala leh Justice Manoj Misra te ngaihtuah niin peittioner zingah hian Indian Union Muslim League (a Kerala-based political party) bakah opposition leaders Jairam Ramesh, Congress leh Mahua Moitra, Trinamool Congress te pawh an tel a ni.
April 9-a ngaihtuah tura tih niin petitioner te chuan CAA hman chu titawp lailawk tur leh CAA chu thleibikna nei tia sawiin Muslim community te kalh a ni an ti bawk.
Petitioner thenkhatte chuan sorkarin zirchiang tura hun tam zawk pek angiat chu an dodal dawn lo tia sawiin mahse Chief Justice kaihhruai bench chu CAA implementation stay rih turin an ngen thung a ni.
Kum 2019 khan Parliament in citizenship bill a pawm hnuah khinna tam tak a lut zui nghal a ni.
Mahse court chuan CAA implementation stay a duh lohna chhan chu rules notify a la ni lo a ti a. Karkalta khan Sibal chuan tunah chuan thil a danglam tawha a chhan chu rules notified a ni tawh a ti a.
“Harsatna ber chu kum li hnuah notification siam chauh a ni a. Dan hnuaiah chuan rules te chu thlaruk hma in notified tur tih a ni. Tuna harsatna ber chu mi tu emaw in khua leh tui nihna a neih tawh chuan laksak leh theih loh tluk a ni ang” tiin sorkarin hun tam zawk pek a ngiatna chungchang court zawhna chu a chhang a.
“Kum 2019 khan rules an notify a, chuvang chuan stay theih a ni lo. A hma kha chuan stay phal leh phal loh a awm thei lo. Rules a awm tlat loh avangin stay theih a ni lo” tiin court hnenah chuan a sawi bawk.
“Eng vangin nge kum 10 ngawt an nghah?” tiin Sibal chuan Congress leh opposition tena kum 2024 Lok Sabha inthlan hisapa sorkarin chet a la tia an puhna chungchang chu a sawi lang bawk a.
“An mamawh zat hun pek ni se, mahse, chutih chhung chuan khua leh tui nihna pe suh se” tiin Indira Jaising chuan a sawi bawk a.
Mehta thung chuan rules te chu inthlan hma daihah tihchhuah a ni tiin a chhang ve thung a ni.
CAA hmang hian Bangladesh, Pakistan leh Afghanistan a non-Muslim te sakhuana thila tih duhdan tuarte chuan India khua leh tui nihna an dil thei a ni. December 31, 2014 hmaa heng ram pathum atanga India ram lut Hindu, Sikh, Buddhist, Jain, Parsi leh Christian community te chu khua leh tui nihna pek theih an ni.
Opposition te chuan sorkar chu Parliament in a pawmna kum li hnuah Lok Sabha inthlana chet that phah nana hman tuma kalpui chauhah puhin an sawisel nasa hle a. CAA hian loh theih lohin West Bengal leh Assam-ah te chuan inthlan a nghawng na dawn a ni tiin Ramesh chuan a sawi.
Trinamool boss leh Bengal Chief Minister Mamata Banerjee chuan CAA chuan intluktlanna a keng tel lo khua leh tui nih theihna laksakna phiarrukna zawk a ni a ti a. “BJP leader ten CAA cuan rights a pe ang che an ti a. Mahse, khua leh tui nih i dil veleh illegal immigrants niin i rights i hloh zawk ang. I rights hlohin detention camp ah an hruai ang che u. Chuvagin in dil hma in ngaihtuah ngun rawh u,” tiin a sawi.