AR chhuahna tura hmalakna zawng zawng hi MNF tih vek – Tawnluia

AR chhuahna tura hmalakna
zawng zawng hi MNF tih vek
– Tawnluia
Assam Rifles sawnchhuahna tura lehkha pawimawh leh hmalakna awm zawng zawng chu MNF sawrkar laia tih vek a ni tih MNF hruaitu Tawnluia chuan a sawi a. Tun sawrkar nena agreement an siamah hnam tana him lo tam tak a awm thei nia a lan thu a sawi.
Thawhtannia MNF office-a inkhawmah MNF National Core Committee member Tawnluia chuan, chief minister Pu Laldenga hun atang tawhin Assam Rifles hian an ram luah hi a vaiin an chhuahsan tur a ni, tih chu an dinna nghet tak a ni a. AR sawnchhuahna tur chungchanga lehkha pawimawh leh hmalakna awm zawng zawng chu an tih vek a ni a, an hmalakna hi chhui theihin a awm vek tih a sawi
AR sawnchhuah chungchangah hian MNF party-in kum 1988-a General Assembly-ah an pass tawh a, an hmunhlui pawh vantlang /mipui tan hman ni rawh se, tih thlengin an lo pass tawh tih a sawi.
“AR sawnchhuah hi hnam issue a nih avangin chhuak ngei se kan duh a. Tuna kan sawrkar nena agreement an siam erawh hnam tana him lo tam tak awm thei niin a lang thung. Hnam himna tura puih an ngaihnaah puih kan inhuam reng a, a hmun erawh joint verification an neih hma chuan khawih chet ni lo se a tha hle in ka hria,” Tawnluia hian a ti.
Kum 1952 khan Luhshai Hills DC S Bartakati-a’n Assam Rifles standing order No.II of 1952 a siam a, chu chu Assam Gazzette-ah ni 8.8.1952 a chhuah niin, chutah chuan Khatla AR awmna hi an thingtuah lakna atan chauha pek an ni a, land ownership pek tel an ni lo tih sawiin, an tidanglam thiang loa, an hman loh chuan sawrkarah an pe let leh tur a ni, tih a nih thu a sawi.
“Kum 1986-a remna thuthlung ziah a nih khan Pu Laldenga ngaihpawimawh hmasak ber zing ami chu AR sawnchhuah a ni. Zokhawsanga AR ram tur pek pawh Pu Denga CM lai, Revenue minister ka nihlai a ni. A tirah kan leng lo e, tiin an rawn report-a, survey neih nawn leh niin, mimal ram dilin cheng vaibelchhe 92 compensate-ah kan sen phah. 1988 May 31-ah Zokhawsanga an awmna tur hi tihfel sak an ni a, AR sawnchhuahna tura hma latu chu Pu Laldenga a ni,” MNF hruaitu hian a ti.
AR biak in hmun chungchangah tuna chief minister-in MoU draft awm tawhah AR neih hlen tur anga a sawi chu thudik lo a ni tih deputy chief minister hlui Tawnluia hian a ti a. AR lamin draft rawn siam mah se, an pawmpui lo tih a sawi.
“Kan sawrkarah khan Quarter Guard leh Loch House pawh hi Mizoram sawrkarah an hlan ngei ngei tur a ni, tih kha kan thu hnuhnung a ni a. Zokhawsanga an insawn hunah biak in leh a compound hi Mizoram Synod hnena hlan a ni ang, tih a nih angin, kum 1987-ah kan pe. Pu Denga hunah khan kan party office turin tuna Aizawl Dak Inpui leh AR biak in hi min kawhhmuh a, Pu Denga khan kohhran biak in kan khawih thiang lo, a ti a. AR biak in hi kan chhuhsak loa, kan lo humhalh sak zawk a ni,” a ti.
Kum 2002 khan AR chhuahsan tur ram awl hi vantlang (public purpose) ah hman ni rawh se, tih dan an siam a. Legislation-ah an pass bawk tih sawiin, AR pawhin an insawn dawn chuan, tia tihfel ni rawh se, an tih zawng zawng pawh tihfel vek a ni tih a sawi bawk.