AR chhuahsan ram a him lo tan

Lammual leh a chhehvel Assam Rifles-in an chhuahsan hmun thenkhat pawnlam mi an luh theih avangin an him lo tan a, nauban leh thildang rukbo a awm thin bakah in ruaka lo riak tawk pawh an awm tih sawi a ni.Tunhnaiah Aizawl Hmathlir Pawl chuan hetianga AR chhuahsan hmuna thil thleng a awm thu hi a hria a, he pawl member, social activist Vanramchhuangi chuan hei hi bawhzuiin Aizawl Police Station-ah pawh first information report a thehlut a ni.
Vanramchhuangi sawi danin, AR ram chuahsan, an hospital thin bula nauban chu mi pakhatin satha ip hnih a ruk thu sawi a awm a, a sawituten an bawhzui mai loh avangin a bawhzui ta a ni.
Nauban rutu hi Dawrpui Local Council-in an man a, police hnenah an hlan. Aizawl PS-a FIR a thehluh tawh angin a ni pawh koh a ni a, a nauban ruk hralh bang satha ip khat chu a awm thinna thinga phuar beh leh an tum tih a sawi a ni. Nauban rutu hi hun rei tak nauban leh pangpar dang ru tawh thin, AR rama nauban pawh a tumkhat rukna a ni lo a ni tih hriat a nih thu a sawi a ni.
Wildlife Protection Act 1972 (WPA) sawi angin, nauban ruk hi ram dan dinglai bawhchhiatna a ni a. Senhri sen (state pangpar) leh Senhri pawl (blue vanda) lak zawrh leh lei phei chu kum 3 atanga kum 7 thleng lung in tan leh Rs. 25000 chawia hrem theih a ni tih a sawi bawk.
AR ram chhuahsana nauban leh thildang a him loh vang leh, sipai luah thin in ruak chu zan lama riah thinna atana hmang an tam thin avangin Centre for Environment and Social Justice, Aizawl Hmathlir Pawl leh Association for Environmental Preservation chuan chief minister hnenah a rang thei ang bera vengtu police dah turin ngenna lehkha an thehlut tih sawiin, an ngenna tihhlawhtling se an duh hle tih an sawi a ni.
Thudawn danin Lammual chhehvelah hian Zokhawsanga la phei lo Assam Rifles tlem azawng la awm mah se, a tam zawk an chhuah tawh avangin a ram chhung zawng zawng an veng tawh lo nia sawi a ni.