AR chhuahsan ramah kut thlak tan Sum siamna rilru pu loin thawk ang – Chief minister

AR chhuahsan ramah kut thlak tan
Sum siamna rilru pu loin thawk ang
– Chief minister
Assam Rifles chhuahsan ramah kut thlak tan a ni a, Heritage Court tlangah Aizawl khawpui chei tharna hnathawh bul tanna tur lungphum chu Thawhlehni zing khan chief minister Lalduhoma’n a phum a. Excavator hmangin kawng zauhna laih zui a ni.
Chief minister chuan, Assam Rifles ram chhuahsan hman dan tur reltu Advisory Committee chu mipui huapzo pawl hrang hrang telna a ni a, an thutlukna chu sawrkar thutlukna bik niloin, mipui thutlukna a ni tih a sawi. A ram hman dan tur rawtna an dawng hnem hle a, tun ami ang hian an pawm ta a. Rawtna dang dawn belh an tum tawh loa, tun ami hi a final-na, ding reng tawh tur a ni, tiin, mandir sawnna erawh dap a ngai a, Prime minister leh Union Home minister thlengin thlen a ni tawh a, tawngtainaa dil a tul tih a sawi.
“Bazar Bungkawna mimal leh pawlten ram an neih, Aizawl Square atana siam tura tiha ram neitute be turin palai kan tir dawn a. Kan ram tan a ni tih hriaa rilru inhawng taka lo dawr turin ram neitute ka ngen a ni,” a ti.
Aizawl khawpui laili chu hmun mawi tak, naupang tana lenna nuam, thalai tana hmun tha, upate tan hawi khawthawnna hmun remchanga chantir an tum a. Kan zavaia tan a ni tih hria in, mitinin inhawng takin he hnathawh hi thawhpui turin a ngen tih chief minister hian a sawi a. A thawktute pawhin a hlawkna lam chauh ngaihtuah loin, ram tan a ni tih hriain thawk se an duh tih a sawi a ni.
“Kawngpui laih zauh hna kan tan a, a tak ram thleng thuai thuai se kan duh a, chak taka hmalak tum a ni. Sum siamna rilru pu loin, history-ah a chuang tawh dawn a, kan tu leh fate tan rilru thianghlim tak pua thawk turin ka chah a ni,” a ti.
UD&PA minister K Sapdanga pawhin, hmasawnna project pakhat an thawk dawn a ni satliah loa, ramin Pathian malsawmna ropui tak a dawn kan lawm tel tih a sawi. UT inthlan hmasa berah Aizawl laili atanga Assam Rifles sawn chhuah hi sawi rik a lo ni tawh a, an chhuahsan theihnan political party tinin hma an la vek a, vawiina sawrkar chu an vannei a, an hunah a takin a lo thleng ta tih sawiin, “Kan zaa kan lawmna tur a ni a, lungrualna min thlentu ni nghal se a duhawm hle,” a ti.
8 AR ram cheithatna tur master plan hi UD&PA-in a duang a, ruahmanna an siam chu Advisory Committee-a chhawp chhuah niin, a tul angin an siamtha. Advisory Committee-in a pawm tawhte bawhzuitu tur Steering Committee an awm leh a ni.
8 Ruahman dan chuan, Saron Veng BCM biak in atanga intanin chhuah lamah kawngpui laih a ni anga, Dak Inpui bulah a chhuak ang. Kawngpui thar sial leh kawngpui awmsa cheina atan cheng vaibelchhe 23 dah niin, sanction hmuh tawh a ni. PWD-in an thawk ang.
8 Bazar Bungkawn atanga intanin Aizawl Square mawi tak sak tum a ni a. Aizawl Square thlangah hian Police Outpost dah tura ruahman a ni.
8 Saron Veng atanga Dak Inpui inpawhna kawngpui kiang hmun remchangah Aizawl khawpui laili chawmtu tur Power Sub Station bun tum a ni.
8 Lammual sir hmar lamah mi 2000 leng, hall leh auditorium dang nei tel, lirthei tam tham tak dahna nei ‘Vanapa Hall’ sak tum a ni a. Architectural design hi inelna hmanga neih tur a ni. Registration tih theih nghal a ni a, May 29 khian intihsiak result puan hman tum a ni.
8 Vanapa Hall thar tur dawt chiah chhim lam tlang, Lammual thlir theihna remchang ni bawkah tuizem lian dah tum a ni a. Mawi taka chei a, mipui thutna tur tam tak siam nghal tur a ni.
8 Canteen Kualah park sak tum a ni a. Vanapa Hall thar leh tuizem dahna tur inkarah public park sak a ni ang. Hmun zau tak hi ‘green zone’ leh ‘walking trails’ atan dah a ni.
8 Dak Inpui hnaih kawngpui thar kiangah open amphitheatre dah a ni anga, multi level car parking a awm bawk ang. Kawngpui thar hmun tha laiah khawthlirna sak tum a ni.
8 Heritage Court, Vanapa Hall ep tlang chu cheithat tur a ni a, building 8 cheithat a, thenkhat thiah tum a ni. Sak belh a awm bawk ang. Hmun mawi taka siam a ni dawn a, cheng vbch. 13 sengin PWD-in hma a la dawn. Hna bul tan mai turin khawl pawh an chhawp tawh.
8 Sum ruahman dan chu – Heritage Court chhehvelah vbch. 13.18, kawng zauh (Treasury Square to Bazar Bungkawn), vbch. 22.36, Power Sub-Station vbch. 09.20, Vanapa Hall & Park, Aizawl Square vbch. 56.82 leh PHED tuizem lian vbch. 04.00 a ni.