AR ram luah bula ram neiten Supreme Court hawi hreh lo

AR ram luah bula ram neiten
Supreme Court hawi hreh lo
Aizawl khawpui chhunga Assam Rifles ram luah bulhnaia awm, Mizoram sawrkarin dan anga thlapa ram a pekte chuan an beisei anga High Court thuthlukna a kal lo a nih chuan Supreme Court lam hawi an tum tih an sawi.
Land Owners’ Association (Outside AR Land) thuchhuak chuan, Assam Gazzete 1952-in Assam Rifles ram luah chin a ziah pawn lamah Mizoram sawrkar Revenue department-in dan ang thlapin ram a pe a. LSC-ah siamin chhiah pawh kum tin, kum 2019-a High Court-a an kal thlengin an pe tih an sawi.
Assam Rifles-in ‘kan ram chhungah in awm,’ tiin in pawh sak an phal loh avangin, an dikna lantir turin Gauhati High Court Aizawl Bench-ah an zualko ta a. Kum 2024-a Land Revenue & Settlement minister Pu B Lalchhanzova hoa thutkhawmah pawh Central YMA-in PIL a thehluha a duh angin, court-a kalte sawrkar ram ruak hmun danga sawn a remti a. Tunah High Court-in an case a ngaihtuah mek niin an hria a. Document tha tak leh belhchian dawl nena an tan pawha engemaw avanga an chak lo a nih chuan, Supreme Court-a kal nghal turin an inhriattir tih an sawi.