AR sawnchhuah leh CS thar tur sawipui

Rajya Sabha MP K Vanlalvena chuan New Delhi-ah Union Home minister Amit Shah chu a chennaah hmuin thil pawimawh a sawipui.
Thenawm ram Myanmar politics inthlak mek sawipuiin “Act East Policy” kalpui mek hnuaia Mizoram chhim lamin tuifinriat a pawhna tur kawngpui sial, KMMTTP Road tihpuitlinna tur, Indo- Myanmar Border Trade Centre Zokhawthar awmze nei zawka a kal theihnan security thilah thil pawimawh sawrkar laipuiin a tih thar ngai nia a hriat thu a sawipui a ni.
Aizawl laili atanga Zokhawsanga Assam Rifles insawn tur pawh Union Home minister chu sawipuiin, he ruahmanna lo intanna chu, kum 1988-a Assam Rifles leh mipui inhmuh thiamlohnaah Assam Rifles-in mipui pawisawi lo mi 11 an kahhlum vang leh mi tamtakin hliam an tawrh vangin, civil mite nena intihbuaina a awm fo lohna tura khawpui laili atanga AR sawn chhuah chu tih makmawh nia hria in, khatih laia chief minister Pu Laldenga ruahmanna a ni tih a hrilhfiah.
Kum 36 ral hnuah pawh an la chhuak lo fo leh nikuma amah Amit Shah ngei Aizawlah lokala a rawn enfiah tawh hnuah an la insawn lo fo hi mipuiin an hrethiam lo tih a hrilh a ni.
Mizoram chief secretary ni lai Renu Sharma, IAS chu kumin October-ah a pension tawh tur a nih avangin Mizo hnahthlak zing ami, Mizo tawng thiam IAS senior Mizoram chief secretary-a dah a tul thu Home minister hi a sawipui bawk.