Arab ramten Gaza tun din lehna tur pawm

Arab ramten Gaza tun din lehna tur pawm
Arab ram hruaitute chuan President Donald Trump-a’n US-in ‘Gaza chana a mi cheng Palestinian maktaduai hnihte hmun danga sawn’ a tum mek laiin $ tluklehdingawn 53-a tun din lehna tur chu Egyptian khawpui, Cairo-a thutkhawm hmanhmawh an kohvah an pawm.
“Egypt ruahmanna hi Arab ruahmanna a ni ta,” tiin Arab League Secretary General Ahmed Aboul Gheit chuan an thutkhawm zawhah a puang a ni.
President Trump-a rawtna sawi lang si lovin Gheit-a chuan ‘Arab-te chuan mi baihvaitir emaw, tih luihna hmun danga dah emaw chu an pawm lo’ tih a sawi bawk.
Egypt hian Gaza atana ruahmanna, phek 91-a chhah a duang a, hetah hian veng changkang tak tak din te, vantlang intawhkhawmna tur siam te pawh a tel a, he hi US-in ‘Middle East Riviera’ din tuma hma a lakna do letna a ni.
Arab ramten hetianga ruahmanna an siam hi bungrua leh thil danga tihhmasawn bakah politics leh Palestinian-te dikna chanvo humhalhsaknaa an ngai a ni.
Egypt President Abdul Fattah al-Sisi chuan an intawh khawm a hawnnah hmuh theiha Gaza tun din piah lamah ram pahnih, Israel hrula Palestinian ram a awm theihna tura thil kal zel a ni tih a sawi a. Arab ramte hian Palestinian-te tana ram din hi nakin zel atana buaina chin felna tur niin an ngai a, Israel Prime Minister Benjamin Netanyahu leh a thawhpuite erawh chuan an duh lo bur thung.
Ruahmanna tharah hian Gaza chu ‘Palestinian sorkar thlazar hnuaiah Gaza management committee-in an enkawl ang’ a, hetah hian technocrat lama mi thiam an awm ang.
Hamas-ten chanvo an nei dawn em tih erawh sawi lan chiah a ni lo va, anni hi Israel chhut chimih a tum leh tuna indona chhuahna bul an ni.
Arab ram thenkhat pawh hian Hamas tih chimih hi an duh ve tho va, thenkhat erawh chuan Palestinian-te kuta dah chi niin an ngai a. Anmahni hian Gaza enkawltua tel loh chu an duh thei ang a; mahse, ralthuam tun vek erawh thil chiang lo a ni thung.
Arab-ten ruahmanna an siam hi thawh thum tur niin thawh hmasa ber, thla ruk vel chu indona avanga thil chhiate senghawi hun a ni dawn a, a dawt leh thawh hnih erawh chuan kum tam tak a daih a ngai thung ang.
Hna thawh a nih chhung hian Palestinian maktaduai 1.5 vel chu chenna tur siam lailawkah an awm dawn a ni.
Hamas-ten October 7, 2023-a Israel beia mi 1,200 chuang an thah bakah mi 251 an man hnuah an awmna, Gaza chu sipai chakna hmangin Israel hian a bei let a. UN chuan in ding 90% chu a chhia niin a sawi.
Heng tung ding leh tur hian US president-in ruahmanna a nei a, hei hi Arab leh khawvelin mak an ti a, Arab ramte hian ruahmanna dang an nei ta a ni.