Arambai Tenggol miten
Meitei hel pawl bei
November, 2023-a Manipur leh sorkar laipui nena inkahhai remna ziaktu Meitei hel pawl mi palite chu Arambai Tenggol (AT) mi nia hriat 15020 velin an beihnaah hliam an tuar tih police chuan Pathianni khan X-ah an tar lang.
Inrinnia thil thlengah hian lehlam lehlam hi an inkap tawn niin police chuan an sawi.
AT mite hi United National Liberation Front (Pambei) (UNLF (P)) nia hriat kum 56 mi, Tonsana tia hriat bawk, Irengbam Nandakumar Singh inah kalin intihbuaina a thleng zui ta a ni.
“Venhim hna thawktuten an pan nghal thuai a. UNLF (P) mite hi hren niin damdawi inah enkawl tura lak an ni a. An nunna atana hlauhawm khawp an nei lo va, silaia kahna ni lo hliam tenau an tuar,” tiin an tar lang.
Venhim hna thawktute hian Imphal East district-a Porompat Police Station huang chhunga AT Unit-17 hmun an dap nghal a, thil rinhlelhawm an hai chhuah zinga heroine ni ngeia hriat gram 15 a tel tih police chuan an sawi.
AT aiawhte hian February 25 khan Manipur Governor Ajay Kumar Bhalla hmuin an state ramria muanna a awm theih dan turte an sawipui a. Larsap hnenah hian civil mite bei lo tur te, central force leh police-in venhimna that lohna hmunte hnawh khat vek turin an ngen.
Manipur-ah hian phaia cheng Meitei leh tlang rama hnam hrang hrang, Kuki te chu May, 2023 atangin thil chi hrang hrang avangin an intibuai tawh.
Kuki-te hian AT-in buaina a chhuah tirh khan district inrinaa khuate an bei niin an puh a, hei vang hian an khua veng him turin silai an lek ve ta niin an insawi a. AT mi tam tak tak chu police ralthuam rua puhin thubuai siamsak an ni.
AT hian buaina chhuah tirh khan venhim hna thawktuten an ven him zawh loh em avangin loh theih lohvin ralthuam an ken ve phah niin an insawi ve bawk a. Venhimna a that loh avang hian Kuki helten tlang bulthut khuate an bei nasa niin an sawi bawk.
Police chuan Manipur-a buainaah hian khawi lam lam pawh hi an inrawlh ve ve niin an sawi.
Assam nena an inrina, Jiribam district-ah pawh September, 2024 khan hel pawl zinga tuallaia lengte chu nasa takin an inkap tih an sawi.
Meitei hel pawl hrang hrang – PLA, KYKL leh KCP te chu kum 10 vel Manipur-ah hian an awm tawh lo va, May, 2023-a buaina a chhuah avang leh Myanmar-a sipai sorkarin an awmna an luahsak avangin an kir leh a. Tunah hian thenawm ramah hian camp tlem azawng an la nei.
UNLF (P) hi Meitei hel pawl zinga sorkar laipui leh state sorkar nena inkahhai puang zinga awm chhun a ni.
Kuki leh Zomi-ah hel pawl thahnem tak an awm bawk a, Kuki National Organisation (KNO) leh United People’s Front (UPF)-ah an inkhaikhawm a. KNO leh UPF hian sorkar nen suspension of operation (SoO) inremna siamin an camp-ah awmin an ralthuamte lek lo turin an ti a. Hetih lai hian Manipur-a tharum thawhna thlengah an la tel nia sawi a ni thin.
Manipur-a buainaah hian mi 250 chuang an thi tawh a, mi 50,000 dawn baihvaiin an awm mek.
Arambai Tenggol miten Meitei hel pawl bei
Get real time updates directly on you device, subscribe now.