Argentina an chak zel

October 13, Zirtawpni zing khan South America khawmual (CONMEBOL) aTanga World Cup 2026 khel tur zawnna round 3 khelh a ni a, World champion Argentina chuan si khat faiin Paraguay an hneh. Argentina hian vawi thum hnehna an chang zawn a, ram 10 zingah khelh hmasak pathuma chak vek thei awmchhun a ni. Argentina an chak laiin Brazil erawh chu an mikhual Venezuela lakah an chak zo lo thung.
World champion Argentina hian Mâs Monumental, Buenos Aires-a an mikhual Paraguay lakah bul an Tan Tha viau a, inkhel Tan aTanga minute thumna lekah defender Nicolás Otamendi chuan pui zetin a pet goal nghal mai a, hmahruaina goal a thun. Hma taka goal an thun vangin an mualah phur takin an inlan a, hnehna chang turin an inringtawk viau bawk. An mikhualte nawr viau mah se goal dang an thun belh thei lo tluan thung.
Paraguay an mikhual Tum hian Argentina captain chuan bul a Tan lova, minute 58-naah bench aTangin a lut. Messi luh hnuin Argentina game a nghet leh zual. Messi hian goal a thun teuh hle a, Tum hnih ngawt goal kham a tih per. Goal thun belh tumin Tan khawh chiam mah se an hlawhtling zo tawh lo va, Otamendi goal thun chakpuiin point thum an hmu. Paraguay laka chakna goal thuntu Otamendi khan Argentina tan vawi 106 khelin, goal 5 a thun tling ta chiah.
Argentina an chak lai hian an elpui lian Brazil chu an mualah an chak zo lo thung a, an mikhual Venezuela nen 1-1 in an inhnehtawk a, hun tawp dawna Eduard Bello goal thun hmangin Venezuela in point khat hlu tak an hmu.
World Cup 2026 khel tur zawnna round hnihna a zawh thlenga hmahruaitu Brazil hian an mikhual Venezuela lakah khel Tha viau mah se goal thun an harsat a, an chance Tha an hlah fo. An tlarhma player te an chet fuh theih loh vangin chawlhlawk hmain goal an thun thei lo phawt.
Chawlhlawk hmain goal thun thei lo mah se Brazil hian chawlhlawk hnu lamah goal an thun ta thuai. Minute 50-naa Neymar corner pet chu Arsenal defender Gabriel Magalhaes chuan a tauh goal a, hmahruaina goal a thun. Gabriel goal thun hi chakpui ngei tumin Tan an khawh zui a, an hlawhtling zo lo va, goal thun belh an tumna an puitlin thei lo bawk. Vinicius Junior goal thun pawmsak a ni lo leh zel bawk nen Brazil vanduai a kal tluang. Hun rei tak chhung hma an hruai hnuin hun tawp dawn hnaihah an chesual a. Minute 85-naah Eduard Bello chuan goal a thun a, Venezuela si phurh a sut. Bello goal luh hnuin goal dang a luh belh thei tawh lova, Brazil leh an mikhual Venzuela te chu 1-1 in an hnehtawk zui ta a ni.
Ninga zinga inkhel dangah World Cup champion hmasa ber Uruguay leh an khingpui Colombia te chu 2 – 2 in an inhnehtawk. Colombia hian an mikhual tan James Rodríguez chuan minute 35-naah hmahruain goal a thun a. He goal hi minute 47-naah Mathías Olivera-a’n a sut. Chawlhlawk hmain chungnung zawk awm lo mah se chawlhlawk hnu lamah Colombia in goal an thun leh thuai a, minute 47-naah Mateus Uribe chuan hma an hruai letna goal a thun. He goal hi Uruguay in an sut thei lo teuh hle a, hun pek belh minute 90+1-ah Liverpool forward Darwin Núñez chuan penalty aTanga goal thunin a sut thei hram a, tlawm an pumpelh hlauh.
CONMEBOL aTanga World Cup 2026 khel tur zawnna kal mekah khelh thum aTanga point kua hmuin Argentina in hma an hruai mek a. Khelh thum aTanga point 7 hmuin Brazil pahnihnaah an awm a. Colombia in pathumna luahin, palinaah Uruguay an an awm a. Khelh thum aTanga point la hmu lo Bolivia chu table mawngphahah an awm mek a ni.