September 6, Zitawpni zing khan South America atang World Cup 2026 khel tur zawnna neih chhunzawm a ni a, table-a hmahruaitu Argentina chuan an awlsam takin hnehna an chang a, hma an hruai chhunzawm zel. Zirtawpni zing hian Bolivia pawhin awlsam takin hnehna an chang ve bawk.
World Champion Argentina hian Mâs Monumental, Buenos Aires-ah Chile an mikhual a, an thiampuipa Lionel Messi tel lova inlan mah ni se 3-0 in hnehna an chang tho thung. World Cup 2022 champion leh Copa America 2024 champion Argentina hian an mikhual Chile lakah an khel tha a, ball chang tam zawk an ni a, hlauhawm pawh an siam fo. An khingpuite nawr tawm viau thin mah se Chawlhlawk hmain goal an thun thei bik lo thung.
Chawlhlawk hnu lamah Argentina an khel tha leh zual a, goal thum ngawt an thun ta nghe nghe. Argentina tan hian midfielder Alexis Mac Allister chuan minute 48-naah Julian Alvarez siamsak atangin hmahruaina goal a thun. Mac Allister goal hnu hnuin goal a luh belh lawk thei lo va, hun tawp dawn hnaiah mualneitu Argentina in goal hnih an thun belh leh. La Albiceleste tan hian Julián Álvarez chuan minute 84-naah an goal hnihna thunin an hmahruaina a tizau a. Paulo Dybala chuan minute – 90’+1-naah an goal thumna thunin an chakna a nem nghet zui ve leh bawk.
Zirtawp zinga inkhel dangah Bolivia chuan an mikhual Venezuela chu si li faiin an sawp. Bolivia tan hian Ramiro Vaca, Carmelo Algarañaz, PenMiguel Terceros leh Enzo Monteiro ten goal khat theuh an thun.
South America khawmual atanga World Cup 2026 khel tur zawnnaah Argentina in vawi sarih an khel tawh a, Argentina hi vawi ruk chakin vawi khat tlawm zawkah an tang tawh a, point 18 hmuin hma an hruai fal mek. Argentina hnuai chiahah hian World Cup-a vawi hnih champion tawh Uruguay an awm a, Uruguay hian vawi ruk khel tawhin point 13 an hmu mek.
Argentina an chak zel
Get real time updates directly on you device, subscribe now.
Prev Post
Next Post