Argentina an tlawm; Brazil an chelh

Ningani zan South American World Cup qualifiers-ah Paraguay ngam loin world champion Argentina an tlawm a; inkhel dangah South American great dang Brazil pawh Venezuela lakah an chak zo bik lo!
Paraguay 2-1 Argentina
Captain Lionel Messi hoa zinchhuak Argentina hian Paraguay khawpui Asuncion-a Defensores del Chaco stadium-ah goal khung hmasain, tan atanga minute 11-na lekah Enzo Fernandez siamsak atangin Lautaro Martinez chuan mikhual hmahruaina goal a khung a; a tirah he goal hi offside vanga hnawl ni mah se VAR endikna a paltlang hnuah goal-a pawm zui leh a ni,
Paraguay nawrlet tan Gustavo Gomez chuan corner atanga ball chhuak hmangin an siphurh a sut nghal teuh hle a, goal kham tauhperin, home team hian an nawr zui leh nghal a, Gustavo Velazquez cross hmangin Antonio Sanabria ‘bicycle kick’ pui tak kan hmu a, he ‘overhead kick’ hmuhnawm lutuk hi Argentina goalkeeper Emiliano Martinez tan dan ngaihna a awm ngang lo!
Beisei loh taka si an chhuah hnuah world champion an insiamtha zui mai thei ta lo a; first half chhungin an thiampuipa Messi a reh vawng vawng a, shot vawikhat a neih ve zuai pawh goal ban sirah a thlawkchhuak.
A lansarh zan ni lo mah se lehlam pawl defender-te ven leh veh erawh a hlawh tho a, chawlhlawk hmain a lakah vawihnih ngawt ‘foul’ mah se Alderete kha referee Anderson Daroco chuan yellow card a pen nawn ta lo hlauh a, player kimin Paraguay-in half time chawlh an hmang thei hram!
Second half an thah atanga tuibur hmuam da pawh tling loah Julio Enciso laka Argentina substitute Leonardo Balerdi ‘foulf’ avangin Paraguay lamin free kick an chhuih a, he ball chhuak hi hlawkpuiin defender Omar Alderete chuan mualneitu team hmahruailetna goal a thun a, Argentina tlawmna goal a ni zui ta a ni.
Hun tawp hma minute 20 la awmah Rodrigo de Paul chuan mikhual siphurh sut tura ‘chance’ tha ber hmu bawk mah se a ball chan chu a duh ang takin a thunun zo lo a, goal lawm hawiin ball thawn phei tho bawk mah se goal ban sirah a thlawh chhuak a; Paraguay lamin goal ven lam an tuipui chhoh tak bawk si avangin Argentina an chefuh zo lo tluan ta a ni.
Inkhelh banah Argentina striker Martinez chuan game pumpui thlirin an khel tha tih a sawi a, inkhel thunun zawk mah se an tihsual pahnih vang liua liaua goal chhuah an nih thu leh set piece-a insiamthat an ngaih thu a sawi.
Argentina coach Lionel Scaloni pawhin press conference-ah second half tir lama goal an chhuah leh chiah khan an tan a tiphet tih sawiin, an tumpuite a lawmpui a, an tlarhnung ven dan a fak zui bawk.
World Cup holders Argentina hian khelh 11-a point 22 hum chungin standing-ah hma an la hruai chhunzawm zel tho a; karleh Thawhle hni khian table-a pakuana luahtu Peru an mikhual ang.
Point 16 nei chunga parukna ni mek Paraguay hian inkhel hmasa lama 4-0 tehrenga Brazil sawptu Ecuador leh Uruguay chu goal difference-ah an pha lo a; nizan result tarlan hman lohah Uruguay hian pahnihna Colombia an mikhual ve bawk.
Venezuela 1-1 Brazil
Vinicius Junior-a penalty pet Venezuela goalkeeper Rafael Romo dansak zanah Brazil-in mualneitu an hneh zo lo a, an chhuahvahna atanga point khat chiah an hawn zawh avangin point 17 nen Brazilian-ho hian South American World Cup qualifier standing-ah pathumna an la thawhsan zo lo.
Tarlan tawh thin angin, United States, Mexico leh Canada-te inthlentawm tur 2026 World Cup hi South America khawmualpui atangin point hmu sang parukin automatic-in an khep pha dawn a ni.
Estadio Monumental, Maturin, Venezuela-a Ningani zan South American World Cup qualifier match-ah hian Raphinha chuan mikhual hmahruaina goal thun bawk mah se Venezuela beilet tan second half-ah substitute Telasco Segovia chuan mualneitu team siphurh sutna goal a thun nawlh a, goal dang luhbelh tawh loin team pahnih an inhnehtawk ringawt!
Hun tawp dawnah substitute Alexander Gonzalez chu Gabriel Martinelli leh Vinicius Jr hmaia a ben avangin hnawhchhuah a ni a; minute 89-ah Vinicius hian Brazil chakna goal thun thei turin penalty a chhuih a, Real Madrid striker hian ropui lo takin a pet a, Venezuela goalkeeper Rafael Romo chuan lo dangin, ball perlet atangin Vinicius’ hian ‘chance’ dang a nei leh a, hei pawh hi goal ruakah a tilut zo lo a, veilam sirah a pet chhuak!
Hun tawp lama tlawm hreh Brazil nawr hi na thawkhat mah se mualneitu team-in an goal an venghim tluan thei a, World Cup champion vawinga ni thei awmchhun Brazil-in point ngain hmahruaitu Argentina an thlau a; point 12 khawl ve tawh Venezuela chu pasarihna an ni.
He inkhelah hian team pahnihin goal thun theihna hun remchang an siamchhuak nual ve ve a, goal attempt vawi 11 ve ve neiin, ball zaa 60 changtu zawk Brazil-in chakpui tham goal an khung zo bik lo a, counter attack atangin an talbuai teuh viau thin bawk.
Peru leh Chile laka chak zawn chunga inrintawkna neilet leh Brazil kha tan phat atangin an hlauhawm nghal a, a biktakin, lehlam tarhnung tan Vinicius a hnawksak chawl lo a, minute 20-ah goal ban a petper nghe nghe.
Tarlan tak angin, chawlhlawk dawn minute 43-ah Raphinha chuan box tlang sir atangin Brazil hmahruaina goal a chhuihlut a, kha goal kha kum 19 chhunga Brazil-in World Cup qualifiers bika free kick goal lawm tur an neih leh vawikhatna chiah niin, kum 2005 daih tawha Real Madrid full-back hlui Roberto Carlos-a’n Venezuela laka a petluh kha an chhunzawm leh ta chiah a ni.