Argentina laka tlawm Brazil an buai

November 22, Nilaini zing khan South America khawmual (CONMEBOL) atanga World Cup 2026 khel tur zawnna khelh chhunzawm a ni a. Football ram ropui Brazil chu an mikhual Argentina lakah an tlawm a, vawi hnih an tlawm zawn vangin Brazil an buai. Argentina an chak rual hian Uruguay leh Colombia ten hnehna an chang ve bawk.
Khelmual ropui Estadio do Maracanã-ah football ram ropui pahnih; Brazil leh Argentina te inkhel tur hian boruak a nei lian hle a, football a inel tak an ni bawka an boruak pawh a sang hle. Inkhel tan hma hauh atangin buaina a chhuak nghal a. Mipui lamah buaina a awm vangin a hun takah inkhel an tan thei lo hial nghe nghe. Inkhel tan a nih hnuin player te an indim lo tawn hle a, foul a tam hle. Inkhel hmuhnawm takah Neymar leh Vinicius Junior tel lova inlan Brazil chu ha nei lo ang mai an ni zui leh a, an elpui lian lakah tlawm zawkah an tang.
Inkhel hmuhnawm leh boruak sang takah hian hun rei tak chhung goal lut a awm theih loh hnuin minute 63-naah dcefender Nicolás Otamendi chuan Messi corner pet a tauh goal a, hmahruaina goal a thun. Argentina in goal an thun hnuin inkhel a hmuhnawm zual sauh a, goal thun tuma Brazil tan khawh a hmuhnawm hle. Ngam takin innawr tawn bawk mah se hun tawp thlengin goal dang a luh belh thei tawh lova, Argentina chuan Brazil mualah ngei hnehna an chang a, point thum hlu tak an hmu.
An elpui lian Brazil laka chak Argentina hian CONMEBOL-ah khelh 6 atanga point 15 hmuin hma an hruai chhunzawm zel. World champion Argentina hi vawi li ngawt an chak zawn hnuin kar hmasa mai khan Uruguay hneh lovin an tlawm ringawt a, an chak tluang lai a tawp. Uruguay laka an tlawm hnuin Brazil an hmachhawn zui leh nghal zat a, pressure tam em em phur chunga inlan ni mah se hnehna pawimawh an chang ta hlauh.
Argentina in hma an hruai chhunzawm zel laiin World Cup a champion ngun ber Brazil erawh an buai ta viau thung. Argentina hian khelh ruk atangin point 7 chauh an la hmu a, paruknaah an awm mek. Brazil hi vawi ruk an khelh tawhah vawi hnih chiah an la chak a, draw vawi khat an neih bakah vawi thum ngawt tlawm zawkah an tang der tawh a. An insiamtha thuai a nih loh chuan football ram ropui bera ngaih ni siin World Cup 2026-ah an tel phak lo rui mai ang tih a hlauhawm hle.
Team lian Brazil lakah an chak vanga lawmna nasa tak an neih lai mekin Argentina hian thu thin thawng, phur zawkna tling an hre chhunzawm ta tlat thung. Ropuina rama hruai let lehtu manager Lionel Scaloni chuan rin lawk loh lutukin a hna chelh mek bansan a rilruk thu a sawi chhuak teh tlat. Copa America, Finalissima leh World Cup-a champion puitu Scaloni hian Argentina hi kum nga chhung a enkawl tawh a, a duh tawk thawkhat ta niin a lang. An manager in ban chungchang a ngaihtuah thu a sawi lai hian Argentina football thuneitu erawh chuan an inrawih chhunzawm theih an beisei thu an sawi ve thung.
Uruguay leh Colombia an chak
Nilai zinga inkhel dangah tunhnaia Argentina hnehtu Uruguay an khel tha chhunzawm a, World Cup champion hmasa ber Uruguay hian an mikhual Bolivia chu si thum faiin an sawp. Uruguay tan hian Liverpool forward Darwin Núñez a vul chhun-zawm a, Bolivia lakah goal hnih (15′ leh 71′) a thun. An goal khat dang hi minute 39-naah Bolivia player Gabriel Villamil-a’n an lama a tih goal a ni ve thung. Bolivia sawptu Uruguay hian tun hnaia an hneh Argentina chu point hnihin an la umphak lova, khelh ruk atanga point 13 hmuin pahnihna an luah chhunzawm zel.
Kar hmasa maia Brazil hnehtu Colombia pawh an khel tha chhunzawm a, nilai zinga an khingpui Paraguay chu minute 11-na leka Rafael Borré goal thun hmangin an hneh a, pathumnaah an awm chhun-zawm ve bawk. Colombia leh Uruguay khel tha hi Brazil tan chanchin duhawm lo tak a ni a. World Cup khel tura an kawng daltu lian an tling thei hial dawn. Hun harsa an tawh laiin Neymar an mamawh hle.