Argentina ramah pawh Marquez unau bawk langsar leh ber

Argentina ramah pawh Marquez unau bawk langsar leh ber
Kumin MotoGP world championship zet chu Spaniard unau Marc Marquez leh a nau Alex Marquez-te tan kum ropui a ni chho mek a, Argentina leilungah pawh karliamta Inrinni sprint race leh Pathianni intlansiak tak takah podium sang ber pahnih luahtu an ni ve ve!
March ni 2, Pathianni pawh khan Marquez brothers hian MotoGP season thar hawnna Thailand Grand Prix lamah MotoGP history thar siamin an lo 1-2 tawh a; MotoGP Argentina Grand Prix-ah pawh an unau bawk hian pakhatna leh pahnihna dinhmun an luah leh!
Santiago del Estero khuaa Autodromo Termas de Rio Hondo tlankawnga Inrinni sprint race-ah six-time MotoGP champion Marc Marquez chu pakhatna niin, a hnung chiahah BK8 Gresini Racing rider Alex Marquez a thleng a; Pathianni main race-ah pawh Ducati Lenovo Team chhuanvawr Marc Marquez bawk pakhatna ni lehin, a nau bawkin a dawt.
Ducati red-hot Marc Marquez leh a nau Alex of Gresini Racing-te hian MotoGP riders’ championship standing lamah pawh a sang ber pahnih an luah mek a; hmahruaitu Marc chuan point 16-in amah hnaihbertu Alex a kalsan mek.
Pathianni race-ah VR46 Racing rider Franco Morbidelli chu pathumna a ni.
Thailand ram season-opening Grand Prix-a bul tan fuh polesitter Marc chuan kum 2019 hnu lama Argentina leilunga intlansiak a hmachhawn leh vawikhatnaah rider dangte um phak rual lohin bike a khalh leh a, podium-ah Alex leh Pertamina Enduro VR46 Racing Team rider Morbidelli-te nen champagne an tauh hawng.
Bike intlansiak level sang ber MotoGP-ah hian kum 76 chhung zet chu unaua pakhatna leh pahnihna dinhmun luahtu hi hmuh tur an awm ngai lo kha a ni a, kumin zzet chu race vawihnih chiah a la awm chungin sprint nen unau 1-2 kan hmu chho ta mawlh mawlh a; Pathianni hnehna kha bike intlansiak class hrang hranga Marc Marquez vawi 90 chak tlinna chiah niin, rider ropui thi ta record a nihrualpui chiah a ni.
Chu chu tlan-kawngah Marc hian lantirin, pangpar kual chhunga thuziak ‘Gracias Angel’ tih a pholang a, van lam kawkin, a record a nihrualpui tak Nieto hriatrengna Spaniard hian a lantir.
Hnehna a chan hnuah Marc chuan, “Angel Nieto record ka tluk thei hi ka hlim takzet a, he hnehna hi amah leh a chhungte tan ka hlan a, a chhan pawh amah kha mi ropui chungchuang bik a ni. He ka mellung thar hi Spanish motorcycle khawvel tan pawh a ni,” a ti.
Marc hian point 74 hum chungin riders’ standing-ah hma a hruai mek a, kum 2019 hnu lama a world title hmasaber tur a beisei mekna kawngah bul a tan fuh phawt a, kumin hian a champion leh theih chuan Italian rider ropui Rossi world title pasarih lak tawh kha a tluk ve chiah dawn bawk a ni.
MotoGP season kal lai hi March ni 30, Pathianni hian Grand Prix of the Americas hmangin an chhunzawm leh dawn a, Texas khawpui Austin-a Circuit of the Americas-ah rider an fuankhawm leh dawn a ni.