Argentina Supreme Court-ah Nazi lehkha pawimawh chhar

Argentina Supreme Court-ah Nazi lehkha pawimawh chhar
Argentina-a Supreme Court hnuaiah Nazi Germany lehkha pawimawh dah khawmna thingrem hmuh chhuah thar a ni.
Beisei loh taka thil hmuh chhuah court thul hluite museum siam thara dah tura singsaknaah thawktuten in hnuai berah an hai chhuak a ni.
Lehkhate hi Tokyo-aGerman embassy-in a thawn chhuah niin Argentina-ah hian June 20, 1941 khan a thleng a. Japanese tuihu lawng hmanga phurh niin inpalai tawnna lehkha 83 a awm niin court thuneitute chuan an sawi.
Supreme Court-ah hian hemi kum vek hian dah niin Argentine custom thuneituten an chhui zuina atan panga an hawng a, a chhungah hian Nazi thu puanzar thil hrang hrang a awm a ni.
Kar hmasa khan hna thawktuten thinga siam champagne dahna bawm an hainaah an hmu chhuak tel a ni.
“Thingrem pakhat kan han hawn chuan a chhungah hian Adolf Hitler-a ngaihdan leh thil kalpui dan inziahna, Argentina-a Indopui II-na hun laia mi a ni tih hriat a ni ta a ni,” an ti.
Building chhunga hmun him zawkah sawn zui nghal niin court thuneitute hian Buenos Aires Holocaust Museum pawh an hrilh nghal bawk.
A thlalak an tihchhuahah chuan mi thiamten thlalak dum leh var an endik lai leh membership booklets, a kawma swastika chuangte pawh a lang.
Chanchin hlui zirtute chuan he thil hian Nazi-in sum leh paia mi a zawm dan leh ram dang a thawhpui dan pawh hriat theih an beisei.
Indopui II-na a tawp hnuah khan Juan Perón-a kaihhruai Argentina kha Nazi-a mi langsar tak takten biruk nan an hmang nasa hle a. An zingah hian Adolf Eichmann leh Josef Mengele te pawh an tel.