The Hague-a hren chungin mayor-ah Duterte thlang tling

The Hague-a hren chungin mayor-ah Duterte thlang tling
Philippine president hlui, Rodrigo Duterte-a chu ruihhlo do a kalpuinaa mi sang tel thihna thleng avanga The Hague-a hren mek a ni chungin an chhungkaw lenna hmunah mayor atan thlan tlin a ni tho.
A thuihhruai rinawm pahnih, a assistant ni reng tawh, Christopher ‘Bong’ Go leh ruihhlo a do laia police chief lo ni tawh, Ronald ‘Bato’ dela Rosa te pawh senate member atan thlan tlin an ni bawk.
Tun inthlan hi midterm election a ni a, Duterte leh Marcos lalram inkarah inbeihna a nasa hle a, result pawh beisei loh tak tak a awm.
Duterte-a fanu, Vice-President Sara Duterte-i chu vote chhiar mekah a tlin dawn leh dawn loh a la hriat loh.
Sara Duterte-i hi kum 2028-ah president chuh tura rin a ni a, a laka thubuai siam a nih avangin senate-ah vote thlaka buk a la hmabak a, a chak loh chuan politics a khelh khap a ni ang.
Midterm-ah hian tual chhung rorel khawl leh governor leh senator eng emaw zat thlan niin seat 18,000 vel zet thlan a ni a. A thlawptu leh a lo thawhpui tawh, President Ferdinand ‘Bongbong’ Marcos Jr inkarah inbeihna a nasa hle.
Candidate-te pawh an inbei nasa a, Duterte-a hote hian senate-a a fanu an buk lohna turin seat kua tal an lak a ngai a, an bei nasa hle.
Thawhtanni zan thleng khan vote tla 68% vel chhiar tawh a ni a, eng nge an dinhmun tur a la chiang lo.
Marcos Jr-a thlawptute chu opinion poll-a an lan dan aiin an che chhia a. An candidate zinga pakhat, broadcaster Erwin Tulfo-a chauh a sang panga zingah a la lang phak rih.
A dang pahnih chu Duterte-a thawhpuite niin independent-in pahnih an hauh rih bawk a, a bak dang 12 erawh vote chhiar chinah an la inum tawk hle hlawm.
Vice-president hi a politics zinkawng tluang lem lo mah se a lar hle a, kum 2028-ah president a kal chhuah tawh dawn bawk avangin a hmabak êng tura ngaih a ni.
Duterte-a hian an ram chhim lama an chhungkaw lennaah hnehna a chang leh a, thla hnih kal taah khan kum 80 mi, an hruaitu lar tak hi Manila Airport-ah man niin Netherlands-ah International Criminal Court-a a chungthu ngaihtuah tura lak nghal a ni.
Man a ni hi Marcos Jr-a remtihnaa tih a ni a, hei hian a fanu leh president a thawhpui inkarah inepna awmin House of Representatives-ah Vice-President Duterte-i hi buk tura tih a ni ta hial a ni.
Duterte putar zawk hi kum 1980 chho vel atanga an chhungkaw awp hmunah a mayor leh ngei hmel a. Chhim lam khawpui lian, Davao atang hian Duterte-a hi kum 20 zet president atana thlan tlin a lo ni tawh a ni.
A fapa naupang ber, mayor ni lai, Sebastian chu vice-mayor atan thlan niin a pa awm loh hlan pawhin a ai a awh thei dawn a. A fapa dang, Paolo chu congressman-ah thlan tlin niin a tu pawh tual chhungah thlan tlin a ni bawk.
Duterte-a hi thubuai a neihah thiam loh a la chan rih loh avangin inthlan hi a la chuh thei a ni.