Armed Veng an tla leh lo, an tla leh!

May 21, Nilaini khan LBS Suzuki 22nd Inter Branch YMA Football 2025 round of 32 khelh a ni a. Zobawk Vengthar hneh lova tla tawh Armed Veng chu Zobawk Vengthar hrem an nih vangin an tla lo leh a. He inelnaa champion ngun ber Armed Veng hi Serchhip Vengchung hneh lovin an tla leh nghal. Nilainia inkhel dangah champion hlui Republic in awlsam takin hnehna an chang a, Bethlehem Veng leh Bethlehem Vengthlangin hnehna changin last 16 an lut bawk.
Armed an tla nawn
Inelna neih meka bul tan tha tak, 23-0 ngawta Upper Republic sawptu Zobawk Vengthar lakah 1-0 a tlawmin he inelna vawi nga champion tawh Armed Veng chu an lo tla tawh a, last 32 an lut zo lo. Hekna a awm bakah organising committee ten chhui a, thil dik lo hmuhchhuah an neih vangin Zobawk Vengthar hi inelna hmachhawn zui thei lo turin hrem an ni. Inelna atanga Zobawk Vengthar hnawhchhuah an nih vangin tla tawh Armed Veng chu Serchhip Vengchung hmachhawn turin tih tlin leh an ni.
Mitthi tho leh Armed Veng leh Serchhip Vengchungte hi Chite Play Ground-ah an inkhel a, an inhnehtawk hle. Inkhel hmuhnawm takah hian hun pangngaiah chak zawk an awm thei lova, 2-2 in an inhnehtawk. Hun pangngaiah chak zawk an awm theih loh vangin tie-break hmangin last 16 lut tur zawk zawn a ni a, 5-4 a chakin Serchhip Venchung an tlang.
Armed Veng hian Serchhip Vengchung lakah bul an tan tha a, Minute 27-naa Lawmfamkima own-goal hmangin hma an hruai. Serchhip Veng chung hi hun rei tak chhung hnufual zawka an tan hnuin Laldikkima Sailo chuan minute 56-naah goal thunin an si phurh a sut.
Goal khat ve ve an an thun hnuin inkhel a hmuhnawm zui viau a, goal hmangin an inchang let leh thuai bawk. Armed Veng tan hian Lalrintluanga chuan minute 60-naah hma an hruai nawn lehna goal a thun. Hma hruai nawn leh mah se Armed Veng hian hma an hruai rei lo viau thung. Minute 63-na lekah Serchhip Veng chung tan Lawmfamkima chuan goal thunin an si phurh a sut nawn leh. 2-2 a nih hnuin inkhel a hmuhnawm a, goal thun tumin an innawr tawn viau bawk. Hun pangngai tawk hnu, hun pek belh tawp dawn tepah Armed Vengin chakna goal an thun teuh hle a, uiawm takin an hun tha neih an hloh.
Hun pangngaiah chak zawk an awm theih loh vangin penalty shoot-out an an intum chhunzawm. Armed Veng tana pet hmasa berin a thelh a, team hnih tana pettu dangin an khung vek thung. Serchhip Vengchung hian he inelna champion ngun ber leh team hrang hrangte hlauh rawn Armed Veng lakah 5-4 in hnehna an chang a, last 16 an inhlangkai ta a ni.
Zobawk hrem an nih dan
Upper Republic an sawp a, football thiam veng an Armed an hneh leh hnuin inelna buatsaihtuten thil dik tawk lo tih report an dawn vangin Zobawk Vengthar hi chhui zui an ni. Inelna neih meka dan an siamin an tel lohna tura tel player an awm tih hmuhchhuah a nih vangin Zobawk Vengthar hi inelna hmachhawn zui thei lo turin hrem an ni ta a ni.
Armed Veng an hneh hnu khan an khingpuite hian organising committee hnenah an khingpuite hian complaint an thehlut niin Zobawk Vengthar YMA Secretary Pu Saidinga chuan a sawi. Pu Saidinga hian Armed in complaint theih hun chhungin an complaint hman lo va, an complaint na hi pawm a ni lo tih Post Sport a hrilh. “Dan bawhchhiat neia kan inngaih loh lai leh a chhuitute lam atanga zawhna pakhat lek pawh kan dawn loh laiin tihthlak kan ni ta mai si a, kan hrethiam lo khawp mai,” Pu Saidinga chuan a ti bawk.
Inelna neih meka Dan an siamah chuan player en dik nan Votter ID hman tur a ni a. Vote an neihna hmunah ngei khelh tur a ni. Zobawkah Vote thlakna booth 1, 2, 3 leh 4 a awm a. Zobawk Vengthar a ni emaw, Zobawk Venglai tiin emaw Voter ID-ah an veng hming a chuang ngai lova, ‘Zobawk’ tih tawp an ni thin. Tunhnaiteah erawh chuan Zobawk North leh Zobawk South tih a ni ve ta thung. Heti a nih vang hian Voter ID atang chuan dik lo anga ngaih palh theih leh hriatchian tawk loh a awm thei nia sawi a ni. Zobawk Vengthar player te hian Felfai lo awm lo leh fair taka inelna hmachhawn thei tura Aizawl pan an nih thu leh Voter ID card chiang lo pakhat pawh kum ruk liam ta chhunga a vote thlak dan en a nih hnua inelna buatsaihtute an pawm hnua kaltir an nih thu Zobawk Vengthar YMA hruaitute hian an sawi bawk. Tihtlak an nih chungchangah thuchhuah an neih tur thu an sawi tel bawk.
Zobawk Vengthar tihtlak an ni a, complaint theih hun chhunga complaint thehlut hman lo Armed Veng tihnun an ni leh hian titi a siam tam zui hle. Mi tam tak chuan Zobawk Vengthar an tla a nih chuan Serchhip Vengchung hi walk over a chak mai turah an ngai hlawm a. Walk over a chaktir ni lo mah se Serchhip Veng chung hian last 16 an lut ta tho a ni.
Result dang
Nilainia inkhel danah vawi khat champion tawh Republic in 5-0 in Khawzawl Zuchhip an hneh a. Bethlehem leh Bethlehem Vengthlangin hnehna changin last 16 an lut a. Hetihlai hian Chhinga Veng chu last 16 lut zo lovin an tla ve thung.